Almaty oblysynyń polıtseıleri alty óńirde izdeýde júrgen er adamdy ustady
TALDYQORǴAN. QazAqparat - Almaty oblysy Qaratal aýdanynyń polıtseıleri Qazaqstannyń birneshe oblystarymen memleketaralyq izdeýde júrgen azamatty ustady, dep habarlaıdy QazAqparat tilshisi.
Almaty oblystyq Polıtsııa departamenti baspasóz qyzmetiniń málimetinshe, 2018 jyldyń 28 jeltoqsanynda Qaraǵandy oblysynyń Ońtústik-shyǵys polıtsııa bólimi Úshtóbe qalasynyń 25 jastaǵy týmasyna bótenniń múlkin urlaǵany úshin izdeý jarııalaǵan. Kúdikti qaladan qashyp, óziniń krımınaldy izderin qaldyra otyryp alaıaqtyq «gastrolderin» ármen qaraı jalǵastyra bergen. Osylaısha, azamat segiz qylmys boıynsha, Qazaqstannyń alty aımaǵynda quqyq qorǵaý organdaryna tanymal bolǵan. Olardyń qatarynda, Almaty qalasynyń Almaly, Bostandyq, Medeý aýdandary, Nur-Sultan qalasynyń Baıqońyr jáne Almaty aýdandary, sonymen qatar Aqmola, Pavlodar jáne Almaty oblystary bar.
«Kelip túsken aqparatty teksere otyryp, biz kúdiktini quryqtadyq. Іzdeýdegi azamatqa birneshe sot tutqyndaýǵa sanktsııa bergeni eskerile otyryp, kúdikti ýaqytsha ustaý oqshaýlaǵyshyna qamaqqa alyndy. Endi oǵan aıdaýylmen negizdi qylmys jasady dep kúdiktelgen jerlerge «gastrolderin« jalǵastyrýyna týra keledi», - dedi Qaratal APB krımınaldyq polıtsııa bólimshesiniń aǵa jedel ýákili polıtsııa kapıtany A. B. Asylhanov.
