Almaty oblysynyń polıtseıi joǵalǵan qos búldirshindi aman-esen taýyp berdi
TALDYQORǴAN.QazAqparat - Almaty oblysyndaǵy Talǵar aýdany Jańalyq aýylynyń ýchaskelik ınspektory 10 jáne 6 jastaǵy eki qyzdyń aman-esen tabylyp, úıine oralýyna kómektesti,- dep habarlaıdy QazAqparat tilshisi.
Oqıǵa 20 naýryz kúni Jańalyq aýylynda bolǵan. Úı aýlasynda oınap júrgen apaly-sińlili eki qyzdy keshqurym anasy taba almaǵan. Polıtsııaǵa habar bergen. Ýchaskelik ınspektor polıtsııa kapıtany Nurjan Oshanov aýyl turǵyndary men mektep muǵalimderin, polıtsııa qyzmetkerlerin izdeýdi uıymdastyryp, nátıjeli eńbek etken. Qyzdar túngi saǵat 00:30 shamasynda aýyl syrtynan aman tabyldy.
«Talǵar aýdanynyń polıtseılerine, ásirese, ózimizdiń ýchaskelik ınspektorǵa alǵysymyz sheksiz. Ol bir emes, eki qyzymdy taýyp berdi. Kúnniń sýyǵyna da, ýaqytqa da qaramaı, bir adamdaı jumyla izdegen aýyldastarymyzǵa, aýyl ákimdigine alǵysymyzdy bildiremiz. Keshe qatty qorqyp kettik. Búgin qyzymyz, mine, qasymyzda otyr. Barlyǵyna kóp rahmet», - deıdi tabylǵan qos qyzdyń ákesi Aımurat Qudaıbergenov.
Esterińizge sala keteıik, keshe jergilikti blogerdiń ınstagramm jelisindegi paraqshasynda Jańalyq aýylynyń eki bala belgisiz baǵytqa ketip, izdestirilip jatqany týraly habar taraǵan. Habarlamada aýyldyń ýchaskelik polıtsııa ınspektory N. Oshanov kez kelgen aqparat bolǵan jaǵdaıda habarlasýyn surap, uıaly telefon nomerin joldaǵan.
