Almaty oblysynyń Panfılov aýdanyna eki sanıtarlyq beket ornatylady
TALDYQORǴAN.QazAqparat - Almaty oblysynyń Panfılov aýdanyna eki sanıtarlyq beket ornatylady. Sebebi, osy aımaqta indetke shaldyqqandar sany kúrt ósken, dep habarlaıdy QazAqparat tilshisi.
«Óńirdegi syrqattanýshylyq boıynsha epıdemıologııalyq jaǵdaı sońǵy 7 kúnde aýdan boıynsha 100 myń turǵynǵa shaqqanda vırýs juqtyrǵandar kórsetkishi - 45,1 paıyzdy ıaǵnı 57 jaǵdaıdy qurap otyr. Sondaı-aq, aýdanda qoǵamdyq tamaqtanatyn oryndar jabylyp, balabaqsha, bilim beretin mekemeler jumysy toqtatyldy. Bilim oshaqtary 80 paıyz onlaın 20 paıyz oflaın formatqa kóshirildi. Qaýlyda kórsetilgen tarmaqtardy basshylyqqa ala otyryp óńirde monıtorıngtik toptardyń jumysyn kúsheıtý tapsyrylǵan», - delingen Panfılov aýdany ákiminiń baspasóz qyzmeti taratqan habarlamada.
Aýdanda sanıtarlyq beket 24 jeltoqsannan bastap qoıylady.
«Aýdandyq bas sanıtar dárigerdiń Qaýlysyna sáıkes 24 jeltoqsan saǵat 7:00-den bastap aýdanǵa kireberis respýblıkalyq jáne oblystyq mańyzy bar joldarǵa sanıtarlyq beket ornatylady. Onda «Polıtsııa men medıtsına qyzmetkerleri jáne jergilikti atqarýshy organdar aýdanǵa kiretin jáne shyǵatyn azamattarǵa baılanyssyz termometrııa jáne saýalnama júrgizý arqyly derekter jınaý úshin sanıtarııalyq beketter ornatylsyn» – dep tolyqtyrdy vedomstvonyń ókilderi.
Ákimdiktiń málimetinshe, Panfılov aýdany pandemııanyń ekinshi tolqynyna tolyqtaı daıyn. Jaqynda ortalyq aýrýhana aýlasyna jańa ottegi stantsııasy ornatylǵan. Aýrýhana boıynsha 20 jasandy tynys alý apparat (IVL) bar. Qosymsha 44 ottegi kontsentraty bólimder men aýyldyq ambýlatorııalarǵa ornatyldy. Sonymen qatar jańa 4 sanıtarlyq avtokólik alynǵan.
