Almaty oblysynyń oqý oryndary jastardy jańa mamandyqtarǵa oqytady
ASTANA. QazAqparat - «Nátıjeli jumyspen qamtý jáne jappaı kásipkerlikti damytý» baǵdarlamasy sheńberinde Almaty oblysynda bıylǵy jańa oqý jylynda kolledjderge 1535 bilim alýshy qabyldanatyn bolady, dep habarlady búgin Almaty oblysy ákimdiginiń baspasóz qyzmeti.
Oqýǵa qabyldanýǵa úmitkerler tizimin jergilikti jerlerde arnaıy qurylǵan mobıldik toptar anyqtaýda. Búgingi kúnge jumysshy mamandyqtardy daıyndaý boıynsha 43 mamandyqtyń tizbesi ázirlenip, kolledjder tizimi bekitilgen.
Oblystyq bilim basqarmasynyń málimetine súıensek, óńirdegi tehnıkalyq jáne kásiptik bilim berý kolledjderine bıylǵy jańa oqý jylynda jalpy memlekettik bilim berý tapsyrysy negizinde oblystyq bıýdjet esebinen 5600-den astam adam qabyldaý josparlanyp otyr. Sonyń 4500-ge jýyǵy jumysshy mamandyqtar boıynsha oqytylatyn bolady. Kolledjderde tehnıkalyq jáne tehnologııalyq, aýyl sharýashylyǵy, qurylys, qyzmet kórsetý salalary boıynsha jáne basqa da baǵytta mamandar daıarlanbaq.
Sonymen qatar birqatar kolledjderde jańa mamandyqtar ashyldy. Máselen, olardyń qatarynda «Gaz qubyrlaryn paıdalaný jáne jóndeý slesary», «Slesar - vagondardy quraýshy», «Ashytý protsesiniń operatory», «Syzýshy», «Kókónis tuzdaýshy», «Qaımaǵy alynbaǵan jáne ashymaly sút ónimderin jasaý sheberi» jáne basqa da búgingi eńbek naryǵynda suranysqa ıe mamandyqtar bar. Bul maqsatqa oblystyq bıýdjetten 90,2 mln. teńge bólinip otyr.
