Almaty oblysynyń mýzeılerine vırtýaldy saıahat jasaýǵa múmkindik týdy
TALDYQORǴAN.QazAqparat - Endi kez-kelgen adam Jetisý jerindegi mýzeılerge vırtýaldy saıahat jasaı alady. Ol úshin tek ǵalamtor bolsa bolǵany. 3d-Tour.kz saıtyna kirseńiz gıdtiń daýysy shyǵyp sizge murajaıdyń ár bólmesi jaıly habardar etedi jáne kez-kelgen jádigerdi ekrandy basý arqyly úlkeıtip kórýge bolady, dep habarlaıdy QazAqparat tilshisi.
Búgin osy jobany júzege asyrǵan avtor Meıirhat Tolqynov brıfıngke arnaıy kelip, jobanyń qyr-syryn jýrnalısterge túsindirip berdi. «Jetisý 360» dep atalatyn joba ázirge Taldyqorǵandaǵy eki mýzeıge vırtýaldy saıahat jasaýǵa múmkindik beredi.
«Muhamedjan Tynyshbaev jáne Іlııas Jansúgirov atyndaǵy mýzeılerge vırtýaldy saıahat jasaı alasyzdar. Bul baǵdarlamada sýretterdiń barlyǵy 360 gradýsta túsirilgen. Kez-kelgen eksponatty úlkeıtip kórýge múmkindik bar. Mundaı jobany júzege asyrý meniń oıyma alǵash ret 360 grdýsta túsken sýretterdi kórgende keldi. Joba 3D formatynda jasalǵan. Ony VR kózildirigimen de kórýge bolady. Bul baǵdarlama Elbasynyń «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» jáne Bolashaqqa baǵdar: rýhanı jańǵyrý baǵdarlamasy aıasynda júzege asyp otyr», - deıdi joba avtory Meıirhat Tolqynov.
Meırhan Tolqynov oblystyq óńirlik kommýnıkatsııa qyzmetiniń tehnıkalyq bóliminiń mamany. Ol buǵan deıin kásibı fotograf bolǵan. 26 jastaǵy joba avtory endi oblystaǵy barlyq 22 mýzeıdi jańa baǵdarlamaǵa engizýdi josparlap otyr.
Aıta ketý kerek, Іlııas Jansúgirov atyndaǵy murajaıda 6 073 eksponat bolsa, Muhamedjan Tynyshbaev atyndaǵy mýzeıdegi jádigerlerdiń sany - 27 454.
