Almaty oblysynyń monoqalasynda sý elektr stantsııasy salynady
TALDYQORǴAN. QazAqparat - Almaty oblysyndaǵy Tekeli monoqalasynda taǵy bir sý elektr stantsııasy salynady. Qýaty 25,8 MVt elektr kesheni Shaja ózeniniń mańynan boı kótermek, dep habarlaıdy QazAqparat tilshisi.
Jańa nysannyń qurylysy 2018 jyly bastalyp, 2021 jyly aıaqtalady dep josparlanýda. Atalǵan jobaǵa 9 mlrd teńge kóleminde ınvestıtsııa tartylmaq. Bul jóninde Tekeli qalasynyń ákimi Baqtııar Ónerbaev shahar turǵyndary aldyndaǵy esebinde málim etti.
Aıta ketý kerek, 2017 jyldyń 6 jeltoqsanynda Tekeli qalasynda 28 MVt «Qora» sý elektr stantsııasy iske qosylǵan bolatyn. Osylaısha Tekeliniń taý ózenderi Prezıdenttiń «Jasyl ekonomıka» saıasatyn júzege asyryp, memlekettik baǵdarlamalardyń oryndalýyna oń septigin tıgizýde. Jalpy 2025 jylǵa deıin Almaty oblysynda elektr stantsııalarynyń jalpy sany 98 ge jetip, 3700 MVt qýat óndirý josparlanýda. Jobany júzege asyrý úshin sý, jel, kún jáne bıologııalyq qaldyqtar paıdalanylmaq. Jalpy qazirgi tańda Almaty oblysynda 21 úlkendi-kishili elektr stantsııasy jumys istep tur.
