Almaty oblysynyń Qosaǵash aýylynda jańa mektep ashyldy
TALDYQORǴAN. QazAqparat - Almaty oblysynyń Kerbulaq aýdany Kóksý aýyldyq okrýgine qarasty Qosaǵash aýylynda 80 oryndyq mektep ashyldy, dep habarlaıdy QazAqparat tilshisi.
Qosaǵash orta mektebiniń qurylysy 2019 jyldyń sáýirinde bastalǵan bolatyn. Joba quny – 700 mln teńgeni qurady. Qarajat oblystyq bıýdjetten bólindi.
Mektep tolyǵymen zamanaýı quraldarmen jabdyqtalǵan. Ár kabınette ár muǵalimniń aldynda kompıýter bar. Odan bólek, kompıýter synyby, qyzdar men ul balalarǵa arnalǵan sheberhana jáne laboratorııa kabınetteri bar.
«Búgin kópten kútken mekteptiń ashylýy bolyp jatyr. Aýylymyzda jańa mektep boı kóterdi. Oqýshylar men ata-analardyń qýanyshynda shek joq. Burynǵy mekteptiń jaǵdaıy nashar bolǵan. Endi muǵalimder jańa kompıýterlik synypta, ınteraktıvti taqtamen sabaq beretin bolady», - dedi Kóksý aýyldyq okrýginiń ákimi Álııa Bahtııarova.
Jańa mektep 38 adamdy jańa jumys ornymen qamtıdy. Onyń 29-y ustazdar qaýymy.
Aıta keteıik, Kerbulaq aýdanynda «Jumyspen qamtý jol kartasy-2020» baǵdarlamasy aıasynda Sarybastaý orta mektebi jáne «Aýyl – el besigi» baǵdarlamasy aıasynda Sarybulaq orta mektebi kúrdeli jóndeýden ótýde.
