Almaty oblysynyń Kóksý aýdanynda jańa sport kesheni ashyldy
TALDYQORǴAN. QazAqparat - Almaty oblysy Kóksý aýdanynyń Balpyq bı aýylynda zamanaýı sport kesheni ashyldy, - dep habarlaıdy QazAqparat tilshisi.
El táýelsizdiginiń 30 jyldyǵy merekesine oraı paıdalanýǵa berilgen sporttyq nysan tolyqtaı qajetti qural jabdyqtarmen qamtamasyz etilgen. Ǵımaratty salýǵa respýblıkalyq bıýdjetten 673 mln teńge qarjy bólingen. Nysannyń jalpy aýmaǵy 3000 sharshy metr. Keshende aýyl jastary sporttyń 12 túri boıynsha jattyǵatyn bolady. Sonymen qatar, kórermenderge arnalǵan 180 adamdyq oryn bar. Jańa nysannyń ashylýyna baılanysty 32 adam turaqty jumyspen qamtylady.
Zamanaýı standarttarǵa saı salynǵan dene shynyqtyrý-saýyqtyrý ortalyǵy kúnine júzdegen adamdy qabyldaýǵa qaýqarly. Munda voleıbol, basketbol, shaǵyn fýtbolǵa arnalǵan zaldar jáne jattyǵý bólmesi bar.
Múmkindigi shekteýli jandar úshin de sportpen aınalysýǵa barlyq jaǵdaı jasalǵan.
Aýdan ákimi Almas Ádildiń sózinshe, keshende sporttyń taǵy birneshe túrinen úıirmeler ashý josparlanyp otyr.
