Almaty oblysynyń keıbir aýdandarynda karantın kúsheıtildi
TALDYQORǴAN. QazAqparat - Epıdemıologııalyq jaǵdaıdyń kúrt ózgerýine baılanysty Kegen, Talǵar aýdandarynda, sondaı-aq Taldyqorǵan qalasynda karantın rejımi kúsheıtildi, dep habarlaıdy QazAqparat.
Bul týraly «Jetisy media» aqparattyq alańynda Almaty oblysy Densaýlyq saqtaý basqarmasynyń basshysy Baýyrjan Ysqaq habarlady. Onyń aıtýynsha, indet juqtyrýǵa qatysty jaǵdaılardyń tirkelýi osy óńirlerde anyqtalǵan. Osyǵan sáıkes, saqtyq sharalary qaıtadan kúsheıtilip otyr.
«Búgingi tańda Almaty oblysynda koronavırýspen aýyrǵandar sany 212-ge jetti. Onyń ishinde 73 patsıent statsıonarda emdelýde. Naýqastarmen 2 254 adam baılanysta bolǵany anyqtaldy, olardyń barlyǵy medıtsınalyq baqylaýǵa alyndy. Epıdemıologııalyq zertteý júrgizilip jatyr. Qazirgi ýaqytta koronavırýs ınfektsııasynyń belsendi 3 oshaǵy bar. Bul Talǵar, Panfılov aýdandary men Taldyqorǵan qalasy. Demek, karantındik sharalar kúsheıtiledi», - dep atap ótti Baýyrjan Ysqaq.
Kúrdeli epıdemıologııalyq jaǵdaıǵa qaramastan, Almaty oblysynda karantındi kezeń-kezeńmen jeńildetý jalǵasyp keledi. 18 sáýirden bastap, oblystyń bas memlekettik sanıtarlyq dárigeriniń jańa qaýlysyna sáıkes, blokpostar alynyp, mańyzdy nysandardyń birqatary jumysqa kirisedi.
«Jospar boıynsha, koronavırýs ınfektsııasy qolaısyz aýmaqtardy qospaǵanda, aýdandar men qalalar arasyndaǵy blokpostar alynyp tastalady. Qoǵamdyq monshalar, saýnalar, SPA, massaj ortalyqtary jumys isteı bastaıdy. Qyzmet kórsetý salasy, syıymdylyǵy 30 oryndyq qoǵamdyq tamaqtaný, sondaı– aq jazǵy alańy bar ashyq aýada jumys isteıtin nysandar,azyq-túlik jáne azyq-túlik satpaıtyn bazarlar saǵat 10:00-den 17:00-ge deıin jumys isteýge ruqsat etiledi», - dedi oblystyń bas memlekettik sanıtarlyq dárigeriniń orynbasary Ashat Charapıev.
Budan basqa, jańa qaýlyǵa sáıkes, sanıtarlyq-dezınfektsııalyq sharalar men maska rejımin qatań saqtaı otyryp, mektepke deıingi uıymdarda kezekshi toptar, shaǵyn bilim berý ortalyqtary, úıirmeler, tehnıkalyq qaýipsizdik boıynsha jaýapty qutqarýshylardy daıarlaý jáne qaıta oqytý, sondaı-aq kúzet jáne basqa da mamandandyrylǵan uıymdar qaıtadan jumys isteıdi. Stadıondar 50 orynǵa deıin ashylady. Qapshaǵaı qalasynda «Baldáýren» respýblıkalyq oqý-saýyqtyrý ortalyǵy « RMQK jumys isteı bastaıdy.
