Almaty oblysynyń kásipkerleri úısiz jandarǵa baspana syılaýdy jalǵastyrýda
Kerbulaq aýdanynyń kásipkerleri taǵy da eki otbasyǵa baspana syılady. Jańa shańyraq ıeleriniń ekeýi de jalǵyz basty analar. Biri 3 kishkentaı balany, ekinshisi 7 balany baǵyp otyr. Sarybulaq aýylynyń turǵyny, 7 balanyń anasy Meıramgúl Baıseıitovaǵa osy aýyldyń sharýa qojalyq basshylary 4 bólmeli úıdi syıǵa tartty.
«Osy kúnge deıin 7 balamen jaldamaly páterde turdym. Eki balam stýdent. 5 balam mektepte oqıdy. Jalǵyz ózim qolymnan kelgeninshe tyrmysyp, balalarymdy jetkizip kelemin. Endi ózimizdiń úıimiz bar. Bul biz úshin úlken kómek boldy. Qojalyq basshylyǵyna alǵysym sheksiz», - dedi kópbalaly ana kózine jas alyp.
Sonymen qatar, Altynemel ulttyq memlekettik tabıǵı parkiniń bas dırektory Halyq Ońǵaruly da jalǵyz basty anaǵa tosyn syı jasady. Ol Sembaı Gúlsanat esimdi jalǵyz basty anaǵa úsh bólmeli úı satyp alyp berdi.
«6 jyldan astam ýaqyt jaldamaly páterde turdym. Kishi balam endi ǵana 3-ke toldy. Eki balam mektepte oqıdy. Týystyń jáne osyndaı jany jomart azamattardyń arqasynda kúnimizdi kórip júrmiz», - dedi jas ana.
Aıta ketý kerek, Kerbulaq aýdanynda sońǵy eki aıda 8 kópbalaly jáne turmysy tómen otbasylar úıli bolǵan. Sonymen qatar, Panfılov aýdanynda jeke kásipker apatty úıde turyp jatqan Baljan Qalıbaevanyń otbasyna 6 bólmeli úı salyp berdi. Áleýmettik jaǵdaıy tómen januıa jaıly aýyl turǵyndarynan estigen jergilikti sharýa qojalyǵynyń basshysy Berik Orazbaı otbasynyń eski úıiniń janynan jańa úı salyp bergen.
«Týǵan jerimniń topyraǵyna dán egip, eńbek etip jatyrmyn. Osy otbasyndaǵy balalardyń jaıy meni qatty alańdatty. Sol sebepti kómek kórsetýdi jón sanadym. Járdemdesýge múmkindigi bar azamattardy osylaısha kópbalaly otbasylarǵa qol ushyn berýge shaqyramyn», - dedi B.Orazbaı.
Esterińizge sala keteıik, buǵan deıin Tekeli qalasynyń turǵyny, 7 balanyń anasy Nazgúl Kójekeevaǵa jergilikti kásipker tórt bólmeli úıdi syıǵa tartqanyn habarlaǵan bolatynbyz.
