Almaty oblysynyń kásipkeri memlekettik baǵdarlama aıasynda bıznesin damytýda
TALDYQORǴAN. QazAqparat - Taldyqorǵandyq kásipker «ekomaqta» qurylys materıalyn shyǵarýdy qolǵa aldy, dep habarlaıdy QazAqparat tilshisi.
Bul ónim negizinen jeke úıler, qoǵamdyq, kommertsııalyq jáne óndiristik ǵımarattar men aýylsharýashylyq qurylysynda dybys ótkizbeý, jylý saqtaý maqsatynda qoldanylady.
«Bızneste bir orynda toqtap qalmaı, memlekettik qoldaýdyń kómegimen óndiris salasyna da bet burýdy oıladym. «Damý» Qoryna kelip «Damý-Óndiris» memlekettik baǵdarlamasy bar ekenin bilip, tolyq málimet aldym. Búgingi kúni «Ekomaqta» kurylys materıalyn shyǵarý óndirisin sátti júrgizip otyrmyn»,- deıdi Grıgorıı Krasnoýsov.
Bul Grıgorıı Krasnoýsovtyń bıznestegi alǵashqy qadamy emes. Ol 2006 jyly Taldyqorǵan qalasynyń ortalyǵynda kishigirim dámhana ashý úshin ǵımaratty jalǵa alyp, bıznes bastaǵan. Aqyryndap óz kásibin jolǵa qoıyp, ıpotekalyq nesıe arqyly nysandy satyp aldy. Kafesiniń jumysy jandanyp, paıda taba bastaǵan soń nesıe arqyly azyq-túlik dúkenin satyp aldy. Al kásipker jańa kásibin «Jeke kásipker Trıýmf» dep atap, qaıta óńdeý ónerkásibi baǵdarlamasy aıasynda óndiris quralyn alý úshin 6 paıyzben Tsentr Kredıt Bankinen nesıe aldy.
