Almaty oblysynyń kásipkeri dárigerlerge qurmet kórsetti
TALDYQORǴAN. QazAqparat – Almaty oblysyndaǵy Panfılov aýdanynyń medıtsına qyzmetkerlerine kásipker qurmet kórsetti, dep habarlaıdy QazAqparat tilshisi.
«Biz birgemiz» respýblıkalyq aktsııasyna Jarkent turǵyndary da qoldaý kórsetýde. Jeksenbi kúni ortalyq aýrýhananyń juqpaly aýrýlar bóliminiń 40 qyzmetkerine jergilikti kásipker Ulan Sarpekov azyq-túlik jetkizip bergen. Sondaı-aq qarjylaı kómekke muqtaj mamandarǵa aqshalaı syılyq jasaǵan.
«Prezıdentimiz bastaǵan aktsııa elimiz boıynsha qoldaý tabýda. Kásipker retinde men de qolymnan kelgenshe kómek kórsettim. Aldaǵy ýaqytta da jalǵasyn tabatyn bolady. Osy oraıda janǵa arasha bolyp eńbek etip jatqan medıtsına qyzmetkerlerine alǵys bildiremin»,- dedi kásipker.
Panfılov aýdany ákiminiń baspasóz qyzmetiniń málimetinshe, aýdandyq juqpaly aýrýlar bóliminiń qyzmetkerleri búginge deıin karantınde jatqan 197 adamǵa qyzmet kórsetken. Qazir barlyǵy baqylaýda.
Aıta ketý kerek, Panfılov aýdanyna ázirge eki sanıtarlyq beket ornatyldy. 24 saǵat jumys istep jatqan arnaıy mamandardy aýdan ákimdiginiń qyzmetkerleri ystyq tamaqpen qamtamasyz etip, qoldaý kórsetýde.
Eske salsaq, Almaty oblysynda koronavırýstyń 6 jaǵdaıy tirkeldi.
