Almaty oblysynyń kásipkeri aýyl balalaryna IT-synyp ashyp berdi
Búgin kásipker zamanaýı kompıýterler, robototehnıka jıyntyqtary, ınteraktıvti taqta syndy qajetti barlyq qurylǵyny ózimen birge alyp kelip, mektep basshylyǵyna tabystady.
«Egemen elimizdiń erteńgi bolashaǵynyń bilimi sapaly bolý úshin IT-synypty tolyǵymen qamtamasyz etýdi sheshtim. Atalǵan synyp zamanaýı 10 kompıýter, robototehnıka jıyntyqtary, ınteraktıvti taqta, proektor, 3D prınter, legomen jabdyqtalady. Kabınet oqýshylardyń sandyq resýrstardy meńgerýine, fızıka, mehanıka, tehnologııany tereńdetip ıgerýge jol ashady», - degen kásipker Ernur Qanatuly IT-synyptyń kiltin mektep basshylyǵyna tabystady.
Barlyq zattardy qabyldap alǵan mektep ujymy qurylǵylardy birden ornatýǵa kirisip ketti.
Aıta keteıik, Kóksý aýdanyna qarasty Zylıha Tamshybaı aýylyndaǵy Z.Tamshybaı mektebi 1974 jyly salynǵan. 45 jyldyq tarıhy bar mektepke oblystyq bıýdjetten 510 mln teńge qarajat bólinip, kúrdeli jóndeý jumystary júrgizildi. Oqýshylardy bilim kúnimen Kóksý aýdanynyń ákimi Almas Ádil arnaıy kelip quttyqtady.
Aıta keterligi, 640 orynǵa arnalǵan bilim oshaǵynda búgingi kúni 282 oqýshy, 39 muǵalim bar.
«Aýdandaǵy mektep bitirýshi 373 túlektiń 206-sy joǵary oqý oryndaryna memlekettik grantqa túsken. Al bıylǵy 2019-2020 oqý jylyn 7419 oqýshymen bastadyq. Onyń 722-si alǵash mektep tabaldyryǵyn attady», - dedi Almas Qabdýluly.
