Almaty oblysynyń Qaratal aýdanynda 12 myń gektar jer zańsyz berilgen
TALDYQORǴAN. QazAqparat - Almaty oblysyndaǵy Qaratal aýdanynyń sheneýnikteri zańsyz jer berýmen aınalysqan. Mundaı olqylyqty Qaratal aýdanynyń prokýrorlary arnaıy tekserý kezinde anyqtady, dep habarlaıdy QazAqparat tilshisi.
Belgili bolǵandaı, jergilikti bılik ókilderi jerge qatysty kóptegen zańsyzdyqtarǵa jol berip kelgen.
«Atap aıtqanda jer aktisin berýde zań burmalanyp, Qaratal aýdandyq ákimshiliginiń atynan jalǵan qujattar ázirlengeni anyqtaldy. Máselen, azamatsha K. Saýtqan 500 gektar jaıylym jerdi 10 jylǵa saýda konkýrsynsyz alǵan. Jalpy Qaratal aýdanynyń ákimshiligi zańsyz túrde 32 azamatqa jalpy kólemi 12 myń gektarǵa jýyq jerdi taratqan», - delingen baspasóz baıanynda.
Atalǵan qylmystyq is Almaty oblystyq jemqorlyqqa qarsy kúres bıýrosynyń qaraýynda jatyr. Qazirgi tańda jalpy kólemi 9,5 myń gektar jer memleketke qaıtaryldy. Onyń kadastrlyq quny 86 mln. teńge.
