Almaty oblysynyń ınvestıtsııalyq múmkindikteri tanystyryldy
ASTANA. QazAqparat - Almaty oblysynyń ákimi Amandyq Batalov «KAZAKH INVEST» UK» AQ basqarma tóraǵasynyń orynbasary Birjan Qaneshevpen kezdesti. Jıynda kompanııanyń qyzmeti tanystyrylyp, óńirlik dırektorlar keńesiniń jergilikti atqarýshy organdarmen ózara qarym-qatynas júıesi baıandaldy, dep habarlaıdy oblys ákiminiń baspasóz qyzmeti.
Kezdesý barysynda oblys ákimi Amandyq Batalov oblysta ınvestıtsııa tartý baǵytynda atqarylyp jatqan jumystarǵa qysqasha toqtalyp ótti. «Qorǵas» HShYO men «Qorǵas - Shyǵys qaqpasy» AEA bazasynda, óńirdiń aýdan, qalalarynda qurylǵan ındýstrıaldy aımaqtar men ónerkásip alańdaryna ınvestıtsııalyq jobalardy ornalastyrý múmkindikteri jaıly aıtyp berdi.
«Almaty oblysy - ınvestıtsııalyq jaǵynan tartymdy aımaq. Bul onyń aýmaqtyq ári tabıǵı-klımattyq turǵydaǵy ereksheligine baılanysty, sonymen qatar kólik dálizderin damytý jáne ınvestıtsııa tartýǵa jasalǵan jaǵdaılar men is-sharalardyń nátıjesi. Investorlarmen júrgizilgen jumystyń arqasynda ótken jyldyń ózinde 25 myń jumys orny ashyldy», - dedi A. Batalov.
Munan soń «KAZAKH INVEST» UK» AQ qyzmetiniń jáne óńirlik dırektorlar keńesiniń jergilikti atqarýshy organdarmen ózara qarym-qatynas júıesiniń tanystyrylymyn aktsıonerlik qoǵamnyń basqarma tóraǵasynyń orynbasary Birjan Qaneshev baıandady. Onyń aıtýynsha, kompanııa Memleket basshysynyń tapsyrmasy boıynsha QR Úkimetiniń qaýlysymen Qazaqstanǵa sheteldik ınvestorlardy tartý jónindegi operator retinde qurylǵan. Kompanııanyń basty mindetteriniń biri - Óńirlik ınvestıtsııa kartasyn qalyptastyrý, árbir aımaqtyń spetsıfıkalyq erekshelikterin esepke ala otyryp, ınvestorlarmen jeke jumys júrgizý ekenin de atap ótti. Osy maqsatta Taldyqorǵan qalasynda jergilikti jerlerdegi ınvestorlarmen jumys isteý úshin kompanııanyń ókildigi ashylmaq.
Jıyndy qorytyndylaǵan oblys ákimi A. Batalov Almaty oblysy «KAZAKH INVEST» UK» AQ ókilderimen birlese otyryp Memleket basshysynyń mańyzdy tapsyrmalarynyń biri ınvestıtsııa tartýda aıtýly nátıjelerge qol jetkizetindikterine senim bildirdi.
Osy kúni resmı delegatsııa Almaty oblysyna jasaǵan sapary barysynda ınvestorlarmen kezdesip, Almaty oblystyq Aımaqtyq damý ortalyǵynyń, «Jetisý» ÁKK» AQ, Taldyqorǵan qalasyndaǵy HQO janyndaǵy ınvestorlarǵa qyzmet kórsetý ortalyǵynyń jumysymen tanysty, sol sııaqty «Taldyqorǵan» ındýstrıaldy aımaǵynda boldy.
Jalpy, qazirgi kezde aımaqta jalpy ınvestıtsııa kólemi 530,9 mlrd teńge bolatyn, 10 myń jumys ornyn qurýǵa múmkindik beretin 63 ınvestıtsııalyq joba júzege asyrylýda. Bulardyń qatarynda «Mareven Fýd Tıan-Shan» JShS, «LÝKOIL Lýbrıkants Ortalyq Azııa» JShS, «Nemish Pharma» JShS, «Baýman» JShS, «Farm Frites» JShS sııaqty iri transulttyq kompanııalardyń qatysýymen júzege asyrylatyn 9 joba bar.
