Almaty oblysynyń HQKO-sy 3 mıllıonnan astam qyzmet kórsetti
ASTANA. QazAqparat - Almaty oblysynyń halyqqa qyzmet kórsetý ortalyǵy 3 mıllıonnan astam qyzmet kórsetti. Bul týraly óńirlik kommýnıkatsııalar qyzmeti alańynda Halyqqa qyzmet kórsetý ortalyǵy departamenti dırektorynyń orynbasary Samat Imanǵalıev aıtty.
Kórsetilgen qyzmettiń 2 mıllıonnan astamy elektrondy formatta, ıaǵnı jalpy kórsetilgen qujattyń 71%-yn qurap otyr.
Azamattardyń kompıýterlik saýattylyǵyn arttyryp, «Elektrondyq úkimet» portalyn tanymal etý maqsatynda ózine-ózi qyzmet kórsetý «Connection point» sektory arqyly 1 mln astam qyzmet kórsetilgen. Sonyn ishinde 339 505 elektrondyq tsıfrlyq qoltańba berildi. Atalǵan elektrondyq tsıfrlyq qoltańbalardy paıdalaný arqyly azamattardyń halyqqa qyzmet kórsetý ortalyqtaryna júginbeı-aq, memlekettik qyzmetterdi úıinde nemese jumys ornynda otyryp alýyna múmkinshilikteri bar.
«Búginde biz memlekettik qyzmetterdi alý úshin barynsha qolaıly jaǵdaı jasap, olardy ońtaılandyryp, avtomattandyrý múmkindikterin qoldanýdamyz. Osylaısha, árbir bólimde azamattar óz betinshe elektrondyq anyqtamalardy alyp, balany balabaqsha kezegine qoıyp, aıyppuldar men baj salyqtaryn tóleı alatyn óz ózine qyzmet kórsetý sektorlary jumys isteýde. Ol úshin elektrondyq tsıfrlyq qoltanba bolsa boldy», - dedi S.Imanǵalıev.
Sondaı-aq, I - II toptaǵy múmkindigi shekteýli jandarǵa kedergisiz memlekettik qyzmetterdi alýyna qolaıly jaǵdaılar jasalynǵan.
Atap aıtsaq, Almaty oblysynda 28 730 múmkindigi shekteýli azamattar tirkelgen. 2017 jyldyń 11 aıynda Biryńǵaı baılanys 1414 ortalyǵyna 3164 ótinish túsip, 3546 memelkettik qyzmet múmkindigi shekteýli jandarǵa úıine shyǵý arqyly kórsetildi. Buǵan qosa, estý jáne sóıleý qabileti nashar múmkindigi shekteýli jandarǵa memlekettik qyzmetterdi kedergisiz kórsetý úshin, aýdandyq jáne qalalyq HQKO bólimderinde 86 qyzmetker ymdaý tiline oqytyldy.
Sondaı-aq, atalǵan bólimderde múmkindigi shekteýli jandarǵa memlekettik qyzmetterdi kórsetý úshin arnaıy jumys oryndary bólinip, estý jáne sóıleý qabileti nashar adamdarǵa qosalqy monıtor arqyly onlaın rejıminde aýdarma jasalynyp turady.
Aǵymdaǵy jyldyń 11 aıynda mobıldik HQKO oblystaǵy aýdan ortalyqtarynan shalǵaı ornalasqan 90 eldi mekenge baryp, 37 267 qyzmet kórsetken.
