Almaty oblysynyń fermerleri kókónis ósirýdiń jańa ádisin oılap tapty

«Eńbekshiqazaq aýdanynyń jergilikti qaýymdastyǵy» Qoǵamdyq Qorynyń qoldaýymen  4 jyl buryn «Shelek fermerleri» baǵdarlamasy ashylǵan. Ersinbek Áýkenuly osynyń aıasynda shaǵyn bıznesin damytýǵa múmkindik alǵan. Qordyń kómegimen 14 jyldan beri qyzanaq ósirip kele jatqan «Shelek fermerleri» kooperatıviniń múshesi - jylyjaıdaǵy jańa ádisti alǵash engizgenderdiń biri. 

«Búginde meniń tórt jylyjaıym bar. Olardyń árqaısysynan 10-14 tonna ónim alamyn. Topyraqta ósse tamyzǵa taman jemisin beretin tuqym jylyjaıda odan kóp buryn ónim berdi. Qyzanaqtar 70 kúnniń ishinde pisedi. Kúniń sýyǵynan keletin kedergi joq, jylyjaıda kúzdiń sońǵy kúnine deıin kókónis ósirýge bolady. Tamshyly sýarý júıesin qoldanyp otyrmyz, óte yńǵaıly. Aýylsharýashylyǵyndaǵy jańalyqtarmen  Qordyń qaramaǵyndaǵy agrobıznes ortalyǵynan habardar etip otyrady. Ózimniń súıikti kásibimniń arqasynda bala-shaǵamdy asyrap, erteńgi nanymdy taýyp otyrmyn», - dedi Ersinbek Áýkenuly.

Ersinbek Áýkenuly jylyjaı qurylysyn salý úshin  «Eńbekshiqazaq aýdanynyń jergilikti qaýymdastyǵy» Qoǵamdyq Qorynan qarjylaı kómek alǵan. 500 otbasy qonystanǵan aýylda turǵyndardyń 10 paıyzy ǵana aýyl sharýashylyǵymen aınalysady.

Al kórshi aýyldyń  burynǵy turǵyny Turǵan Ibragımov agrónerkásippen Shymkent qalasynda tanysyp, jylyjaıda qyzanaq  ósirý ádisin ońtústik óńirden ákelgen. Alaıda eki jyl buryn ómirden ozǵan onyń isin balasy Rollan Ibragımov jalǵastyrýda. Jas fermer az ýaqyttyq  tájirıbesine qaramastan aýylsharýashylyǵyna óziniń jańa tehnologııasyn engizip úlgergen. 

«Balamyz osymen 3-shi jyl kókónis ósirýmen aınalysýda. Alǵashqyda  jylyjaıymyz  zamanaýı  tehnologııalarmen jabdyqtalmaǵan bolatyn. Jyl ótken saıyn Qordyń keńesimen bıznesimizdi kórkeıtip jatyrmyz. Rollan bıyl jylyjaıǵa jyly eden ornalastyrdy. Bul ónim maýsymyn uzartady. Birinshi túsim toptamasyn satyp jiberdik. Qys mezgilinde pesh jaǵyp, kóshetti jalǵastyrýǵa bolady. Túsim ýaqytyn qoldan uzartý qarjynyń kózi bolyp otyr», - dedi jas fermerdiń anasy Ekaterına Ibragımova.

2014 jyldan beri fermerler aýyl sharýashylyǵyna túrli zamanaýı agrotehnologııalardy engizip keledi. Burysh ósirý ádisi aýyl sharýashylyǵyn  damýdyń jańa deńgeıine alyp keldi. Jylyjaıda alǵash burysh ósirgenderdiń biri  - Pavel Kavýnov.

«Fermerler mol ónim alý úshin  bıyldan bastap jylyjaı salýdy qolǵa aldy. Olardyń kóbi qyzanaq, qııar ósirse, men burysh ósirip kórdim. Bıyl 18 ga aýmaqqa burysh otyrǵyzdym. Alty jylyjaıdyń  ár 320 sharshy metrine  800 myń teńgeden shyǵyndaldyq», - dedi Pavel Kavýnov.

Agronomnyń aıtýynsha kooperatıv quramynda 22 adam  bar. Toǵyz fermer jylyjaı salyp úlgergen. Óz esepterinshe, fermerler 2 jyl ishinde kásipke salǵan qarajataryn qaıtaryp almaq.  Qor músheleriniń sózine sensek, Shelek aýdanynda  jylyjaı ósirý ádisi buryn bolmaǵan.  Bul tásil ónim beretin maýsymdy 1,5-2 aıǵa uzartady. Osynyń esebinen fermerlerdiń de  kirisi artpaq.