Almaty oblysynyń Eskeldi aýdany Mańǵystaýǵa 5 vagon shóp jiberdi

TALDYQORǴAN. QazAqparat - Qýańshylyqtan zardap shegip otyrǵan Mańǵystaý óńirine jetisýlyqtar mal azyǵyn jóneltti, dep habarlaıdy QazAqparat tilshisi.

Eskeldi aýdanyna qarasty birneshe eldi meken turǵyndary birigip, bıyl shabylǵan kópjyldyq shóptiń bes vagonyn lyq toltyryp jiberdi. Bul shamamen 70 tonna azyq. Birligi jarasqan aýyl halqy aldaǵy ýaqytta taǵy da shóp jınap jóneltýge daıyn. Bıyl aýdan sharýalary 5400 gektarǵa jońyshqa seýip, shóp orý naýqanyn oıdaǵydaı ótkizip keledi.

«Aýyldaǵy halyqta maldan basqa ne bar? Malynan aıyryldy degen sóz, janynan aıyryldy degenmen birdeı. Soǵan elim dep, osyndaı azamattar bir jaǵadan bas, bir jeńnen qol shyǵaryp, atalarymyz, inilerimiz osylaı birigip jatyrmyz», - dedi Eskeldi aýdanyna qarasty Qaınarly aýylynyń turǵyny Shalqar Beken.