Almaty oblysynyń erlik kórsetken eki jol saqshysy memlekettik nagradaǵa ıe boldy
Almaty oblystyq Polıtsııa Departamenti baspasóz qyzmetiniń málimetinshe, polıtsııa aǵa leıtenanttary Maksım Shevchenko men Rýslan Medelhanov – Almaty oblysy PD Jergilikti polıtsııa qyzmeti basqarmasy Patrýldik polıtsııa rotasynyń ınspektorlary. Olarǵa qyzmet barysynda óz ómirlerine qaýip tónse de, jol apatynan zardap shekkenderdiń ómirin qutqaryp, ózge jolaýshylardy qaýipsiz jerden aınalyp júrýine jaǵdaı jasaǵany «Erligi úshin» medali tabystaldy.
Memleket Basshysynyń qoly qoıylǵan medaldi eki jol saqshysyna QR Іshki ister mınıstri Erlan Turǵymbaev tabystady. Sala basshysy qos qyzmetkerdi quttyqtap, minsiz eńbegi men kózsiz erlikteri úshin, polıtseılerdiń bedelin arttyrýǵa qosqan úlesteri úshin alǵysyn bildirdi.
«Bul biz úshin úlken qýanysh. Jol apaty oryn alǵan kezde biz qyzmettik boryshymyzdy ótedik. Eń aldymen adamdardy qutqarýdy ǵana oıladyq. Óte qaýipti bolǵany anyq, biraq isimizdi erlik dep sanamaımyn. Biz el aldynda ant bergende, qoldan kelgenshe qorǵan bolamyz dep sendirgenbiz. Kez kelgen polıtseı osylaı jasar edi! Degenmen, memlekettik deńgeıde baǵalaǵany úshin alǵysymyz sheksiz. Qazaqstan Respýblıkasyna qyzmet etemin!»,- dedi qýanysh ıesi polıtsııa aǵa leıtenanty Rýslan Medelhanov.
Esterińizge sala keteıik, tótenshe jaǵdaı 2020 jyly 18 shilde kúni Almaty – Óskemen avtojolynyń 548 shaqyrymynda, naqty aıtqanda Úsharal qalasyna kireberiste oryn alǵan bolatyn. Tejegishi isten shyqqan gaz tasymaldaıtyn Zıl kóligi jolyndaǵy polıtseılerdiń kóligin, Mazda jáne Reno markaly avtokólikterdi soǵyp, aýdarylǵan soń órtengen. Ár sekýndtyń mańyzdylyǵyn bilgen qos jol saqshysy Zıl júrgizýshisin qaýipsiz jerge shyǵaryp, ózge kólikter úshin qaýipsiz aınalma joldy uıymdastyrǵan. Durys sheshim qabyldanǵandyqtan, gaz kóliginiń jarylysynan zardap shekken adam joq. Jarylystyń qatty bolǵany sonshalyq, júk kóliginiń bólshekteri bir shaqyrym jerden tabylǵan.