Almaty oblysynyń Eńbekshiqazaq aýdanynda 79 eldi mekenniń 56-syna gaz tartylmaǵan
Osy aýdandaǵy jergilikti turǵyndardy gazdandyrý jumystarynyń sylbyr júrýi mazalaıdy. Máselen, gazdandyrý jumystary 2014 jyly bastalǵanyna qaramastan aýdandaǵy 79 eldi mekenniń 56-syna kógildir otyn jetpegen. ıAǵnı, búgingi kúnge deıin tirkelgen 25 myń abonenttiń tek 6 myńy ǵana gazǵa qosylǵan.
Jospar boıynsha 2022-2023 jyldary Saımasaı jáne Qaınar aýyldaryna jobalyq quny 2,5 mlrd. teńge bolatyn gazdandyrý jumystary júrgizilýi tıis. Ony «QazTransAımaq» AQ qarjylandyrady. Qazir 89 km-lik gaz júıesiniń 42 km. ǵana salynǵan. Odan bólek, Taldybulaq, Sataı, Qarakemer aýyldaryn gazdandyrýǵa arnalǵan JSQ daıyndalyp jatyr. Osy jobalar tolyǵymen júzege asqanda 1180 abonent pen 30 áleýmettik jáne kommýnaldyq nysan kógildir otynǵa qol jetkizedi.
Halqy kóp aýdandaǵy suraqtardyń basym bóligi úsh aýysymdy mektepterge arnaldy. Túıini birtindep sheshiletin máseleni jyl sońyna deıin tolyǵymen sheshý múmkin emes. Búgingi kúni oblysta salynyp jatqan 31 bilim salasy nysanynyń 7-eýi úsh aýysymdy mektep. Osy nysandardyń 22-si bıyl paıdalanýǵa beriledi. Onyń ishindegi úsheýi Tóle bı, Tashkensaz aýyldarynda jáne Esik qalasynda mektepter. Barlyǵy 2250 oryndyq oqý oryndarynyń quny 2,8 mlrd. teńge. Dál qazir aýdanda 54 úsh aýysymdy jáne 143 beıimdi mektep bar.
Aýdan turǵyndaryn ekologııalyq máseleler de tolǵandyrady. Atap aıtqanda, óńirdiń tuma tabıǵaty men jergilikti halyqtyń densaýlyǵyna zııanyn tıgizetin qıyrshyq tas karerlerdiń kedergisi kóp.
Karerlerge qatysty másele qatań baqylaýda ekendigin aıtqan Qanat Bozymbaev ony zań aıasynda sheshý úshin ýaqyt qajettigin alǵa tartty.
Oblystyq kásipkerlik jáne ındýstrıaldy-ınnovatsııalyq damý basqarmasy basshysynyń aıtýynsha, Eńbekshiqazaq aýdanyndaǵy 11 karerdiń beseýimen aradaǵy kelisim-shart buzylsa, qalǵan altaýynyń jumysy ýaqytsha toqtatylǵan. Olardyń qanshasy jumys isteıtini nemese aradaǵy kelisim-shart túbegeıli buzylatyny qajetti tekserýlerden keıin ǵana belgili bolady.
Kezdesýde aýdanda elektr qýatynyń jıi óshetindigi de másele retinde kóterildi. Osyǵan oraı aýdan ákimi men oblystyq energetıka jáne turǵyn úı-kommýnaldyq sharýashylyq basqarmalarynyń basshylaryna tapsyrma berildi.
Turǵyndar joldardy jóndeýdiń qajettigi, trotýarlar men kóshelerdi jaryqtandyrýdyń joqtyǵy, qoǵamdyq kólik jumysynyń buzylýy, marshrýttar men avtobýstardyń jetispeýshiligi, tegin úıirmelerdi uıymdastyrýdyń kerektigi syndy máselelerdi kóterdi.
Aýdandy damytýdyń negizgi josparyn tanystyrǵan oblys ákimi Qanat Bozymbaev turǵyndardyń saýaldaryna tolyq jaýap berip, kóterilgen máselelerdi qysqa ýaqyttyń ishinde sheshýdi jaýapty qurylymdarǵa tapsyrdy. Jergilikti jurtshylyq aıtqan máseleler qattamaǵa kirgizilip, kezeń-kezeńimen qaralady.