Almaty oblysynyń demalys oryndaryna 2 myńǵa jýyq maman qajet

TALDYQORǴAN. QazAqparat - Almaty oblysynda týrızm salasynda maman tapshy. Bıyl Jetisý óńirine 2 mıllıonǵa jýyq týrıst saıahattaıdy dep kútilýde. Demalys oryndary men qonaq úılerge jáne basqa da nysandarǵa 2 myńdaı maman qajet, dep habarlaıdy QazAqparat tilshisi.

Qazir Almaty oblysy aýmaǵynda tórt kásiptik kolledj qonaq úı ákimshisi, sýpervaızer syndy kadrlardy oqytyp jatyr.

Alaıda joǵarǵy bilimdi maman daıarlaıtyn oqý oryndary joq. Sondyqtan jastar ózge óńirlerge baryp, bilim alýǵa májbúr.

Jalpy bıyl týrızm salasyna 40 mlrd teńge jeke ınvestıtsııa tartylady dep josparlanǵan.

Al Balqash kóli jaǵalaýyn damytýǵa, ınfraqurylymyn retteýge memleketten 5 mlrd teńge bólinbek.

Munan bólek taý týrızmi klasteri, ulttyq tabıǵı parkter men Alakól, Qapshaǵaı kólderinde aýqymdy jobalar qolǵa alynyp otyr.

«Qonaq úı jáne tamaqtaný salasyndaǵy qyzmetkerlerge tapshy bolyp otyrmyz. Sonymen qatar ekskýrsııa júrgizýshiler, týrızm nusqaýshylary, gıdter, aýdarmashylar, osyndaı mamandyqtarǵa bizde Almaty oblysynyń naryǵynda óte úlken suranys bar»,- dedi Almaty oblystyq týrızm basqarmasynyń basshysy Janar Alshymbaeva.