Almaty oblysynyń delegatsııasy Serbııada bolyp qaıtty
TALDYQORǴAN. QazAqparat - Tamyzdyń 15 men 17-i aralyǵynda ozyq sharýashylyq jetekshileri, QR Eginshilik jáne ósimdik sharýashylyǵy ǵylymı-zertteý ınstıtýty men «Jetisý» áleýmettik-kásipkerlik korporatsııasy basshylary Serbııa Respýblıkasynda bolyp qaıtty. Almaty oblysynyń delegatsııasyn óńir basshysynyń orynbasary Serikjan Beskempirov bastap bardy, dep habarlaıdy Qazaqparat tilshisi.
Sapar barysynda qazaqstandyq delegatsııa Serbııanyń aýylsharýashylyǵy jáne qorshaǵan ortany qorǵaý Mınıstri Branıslav Nedımovıchpen, Voevodına avtonomdyq aımaǵynyń úkimet basshysy Igor Mırovıchpen jáne aýylsharýashylyǵymen aınalysatyn iri serbtik kompanııa jetekshilerimen kezdesti. Sondaı-aq Ońtústik-Shyǵys Eýropaǵa tanymal egin jáne kókónis sharýashylyǵy «NS Semıa» ǵylymı-óndiristik ınstıtýtynda, «Bıosens» ǵylymı-ınnovatsııalyq ınstıtýty men Serbııanyń shaǵyn jáne orta fermerlik sharýashylyqtarynda boldy.
Qazaqstan delegatsııasynyń basshysy Serbııa tarapyn elimizdiń damýyndaǵy negizgi basymdyq QR Prezıdentiniń «Qazaqstannyń úshinshi jańǵyrýy, jahandyq básekege qabilettilik» atty Joldaýynda kórsetilgen agrónerkásip kesheninde eksporttyq baǵytty damytýǵa baǵyttalǵanyn atap ótti. Kezdesý barysynda Qazaqstannyń Serbııadaǵy elshisi Nurbah Rústemov bul sapar eki el arasynda aýylsharýashylyǵy salasyndaǵy qarym-qatynastardy nyǵaıtýǵa baǵyttalǵan kelisimderdiń tájirbıe júzinde iske asyrylýy ekenin tilge tıek etti. Elshiniń aıtýynsha Almaty oblysy men Voevodına avtonomdyq aımaq ákimshiliginiń seriktestik týraly kelisimniń oryndalýy. Eki tarap soıa, qant qyzylshasy, júgeri men kúnbaǵys tuqymyn óndirý salasynda birge jumys isteýde qyzyǵýshylyq tanytqanyn jetkizdi. Aýylsharýashylyǵy ónimderiniń ónimdiligin arttyrý baǵytynda ǵylymı jobalar boıynsha ózara tájirbıe almasýdy kózdeıdi. Budan bólek eki eldiń oqý oryndarynda aýylsharýashylyǵy mamandaryn daıarlaý, kooperatsııa qurý tarapynda birqatar máseleler qaraldy.
Qazan aıynda Voevodına avtonomııalyq aımaq basshysy men serbtik aýylsharýashylyǵy taýar óndirýshileriniń, saýda-sattyq jáne ekonomıklyq qarym-qatynasta qyzyǵýshylyq tanytqan kompanııalardyń Almaty oblysyna jaýapty sapary josparlandy
