Almaty oblysynyń dárigerleri salmaǵy 850 gramm shaqalaqty aman alyp qaldy

QONAEV. QazAqparat - Almaty kópsalaly klınıkalyq aýrýhanasynyń perınataldyq bólimshe dárigerleri salmaǵy 850 gramm bolyp týǵan náresteni aman alyp qaldy, dep habarlaıdy QazAqpart tilshisi.

«Osy jyldyń mamyr aıynda aýrýhananyń perzenthanasyna 27 aptalyq júktilikpen jas áıel kelip tústi. Naýqasta merziminen buryn tolǵaq bastalǵan. Dárigerlerdiń kómegimen jas ana salmaǵy 850 gramm shaqalaqty dúnıege alyp keldi. Shala týǵan balanyń jaǵdaıy aýyr boldy»,- deıdi bólim meńgerýshisi Saltanat Álmuhambetova.

Dárigerdiń aıtýynsha, náreste birneshe kún ókpeni jasandy jeldetý apparatyna qosyldy. Tıisti emdeý júrgizilip, sapaly joǵary tehnologııalyq medıtsınalyq kómek kórsetildi.
«Jańa týǵan nárestelerdi reanımatsııalaý bóliminiń bilikti mamandary men tájirıbeli dárigerleriniń arqasynda eki aıda 1 keli 600 gramm salmaqqa jetip, náresteniń jaǵdaıy turaqtaldy. Qazirgi ýaqytta bala men ana Almaty aımaqtyq balalar klınıkalyq aýrýhanasyna aman - esen aýystyryldy», - dep atap ótti bólim meńgerýshisi.
Óz kezeginde sábıdiń anasy perzenthana qyzmetkerlerine alǵysyn bildirdi.
«Men oblystyq aýrýhananyń perzenthana bólimshesiniń barlyq dárigerlerine alǵysymdy bildiremin. Olar meniń balamnyń ómirin saqtap qaldy», - deıdi jas ana.
Almaty kópsalaly klınıkalyq aýrýhana málimetinshe, byltyrdan beri 1313 bala dúnıege kelgen, onyń 236-sy shala týǵan.