Almaty oblysynyń dárigerleri óńeshine súıek turyp qalǵan áıeldi aman alyp qaldy
QONAEV. QazAqparat - Almaty kópsalaly klınıkalyq aýrýhanasynyń dárigerleri súıek jutyp qoıǵan naýqasty aman alyp qaldy, dep habarlaıdy QazAqparat tilshisi.
Qala turǵynynyń aıtýynsha, ol tórt kún buryn tamaq iship otyrǵanda, súıek jutyp qoıǵan.
«Súıek tamaǵyma ketip qalǵanda men dereý bizdiń aýdandyq aýrýhanaǵa bardym, dárigerler ambýlatorııalyq emdelýge jiberdi. Tamaǵymnyń aýyrǵany basylmady, sodan jeke klınıkaǵa bardym, olar meni oblystyq aýrýhanaǵa jiberdi», - deıdi naýqas.
Tekserý barysynda dárigerler óńeshtiń ish qýysynyń shyryshty qabyǵynda ótkir syzyqtyq jyrtylýlardyń paıda bolǵanyn anyqtaǵan.
«Bastapqyda hırýrgııalyq aralasý arqyly súıekti alý máselesi týyndady, óıtkeni shyryshty qabyq jarylǵan edi jáne súıek aǵzada tórt kúnnen astam boldy. Biraq, konsılıým endoskopııalyq emdeý ádisin júrgizý týraly sheshim qabyldady»,-deıdi klınıkalyq-dıagnostıkalyq bólimsheniń dárigeri Danııar Qojantaıuly.
Almaty oblystyq densaýlyq saqtaý basqarmasy atap ótkendeı, Almaty kópsalaly klınıkalyq aýrýhanasynyń dárigerleri dıagnostıka men emdeýdiń az ınvazıvti endoskopııalyq ádisterin keńinen qoldanady, olar kóptegen jaǵdaılarda klassıkalyq jedel hırýrgııa ádisterin tıimdi almastyrady.
«Aǵzaǵa hırýrgııalyq pyshaq tımegen soń, mundaı aralasýlardan keıin naýqastyń ońalýy áldeqaıda jyldam ótedi. Qazir kezde naýqastyń jaǵdaıy qanaǵattanarlyq dep baǵalanyp otyr»,- dedi dáriger.
