Almaty oblysynyń bolashaq kásipkerleri bıznes-bastamalarǵa ne kedergi ekenin aıtty
«Bastaý» jobasyna qatysýshylarmen oblystyq Kásipkerler palatasynyń dırektory Narıman Ábilshaıyqov pen Kásipkerler palatasy Óńirlik keńesiniń múshesi Janna Telpekbaeva Іle aýdanynda kezdesken bolatyn. Onda bıznesti nesıelendirý, ýchaskeler alý, ónimdi shyǵaratyn naryqty tabý sekildi máseleler de sóz boldy. Palata basshysynyń aıtýynsha, «Bastaý» jobasy ásirese aýyldaǵy kásipkerlikti damytýda asa mańyzdy.
«Aýyldaǵy bıznesti damytýǵa arnalǵan «Bastaý» jobasy Memleket basshysynyń erekshe nazarynda. Sondyqtan da Óńirlik palata men jergilikti atqarýshy organdar tarapynan jobalardy qarjylandyrý men qoldaý boıynsha jan-jaqty is-sharalar qamtyp jatyr», - dep atap ótti Narıman Ábilshaıyqov.
Al jobaǵa qatysýshylar qarjylandyrýdyń jetispeýshiligi bıznes-bastamalardy iske asyrýda negizgi kedergi bolýy múmkin ekenin aıtady.
Aıta keterligi, qazirgi kúni Іle aýdanynda júrip jatqan oqýdyń tórtinshi aýysymyna 36 adam qatysýda. Jalpy aýdanda jyl basynan beri jobaǵa 109 adam qatysyp, onyń 13-i nesıe aldy. Ótken jyly aýdan boıynsha 149 jumyssyz jáne ózin-ózi qamtyǵan azamat qatysty. Olardyń 60-y jeńildetilgen qarjylandyrýǵa qol jetkizdi.
Aıta keterligi, Іle aýdany - Almaty oblysyndaǵy halyq kóp shoǵyrylanǵan ári kásipkerliktiń belsendi ortalyǵy bolyp tabylady. Osy sebepti de aýdandaǵy jyljymaıtyn múlik baǵasy joǵary, kóptegen qyzmet túrleri men taýarlarǵa suranys bar, ótkizý naryqtary jetkilikti. Al óńirdegi bıznes-jobalardyń ortasha somasy 8-10 mıllıon teńgeni quraıdy. Osyǵan baılanysty óńirdegi bıznes bastaýshylar qarjy bólý kezinde aýdannyń ereksheligi men áleýetin esepke alý kerektigin aıtady.
Eske salyp óteıik, búginde Almaty oblysynda «Bastaý» jobasy boıynsha 1 681 adam oqýdy aıaqtap, 245-i nesıe aldy. Sonymen birge qosymsha 52 joba maquldanyp, qarjylandyrýdy kútý ústinde.