Almaty oblysynyń bilim salasynda 70 qylmystyq is qozǵalǵan
Oqý oryndarynda sybaılas jemqorlyqtyń oryn alýy jıilep barady. Dabyl qaqqan sala mamandary Taldyqorǵanda 600-den astam mektep dırektorynyń basyn qosty. Bilim ordalarynda birińǵaı ulttyq testileýge oqýshylardy aqyly daıarlaýdyń ózi jemqorlyqtyń belgisi ekenin aıtady uıymdastyrýshylar. Sebebi testileýge daıyndyq oqý baǵdarlamasy sheńberinde ótedi. Al bilim berý týraly zańnamalarda jalpy bilim berý tegin júrgiziledi dep kórsetilgen.
QR Memlekettik qyzmet isteri jáne sybaılas jemqorlyqpen kúres agenttigi Almaty oblystyq departamentiniń basshysy Serikbaı Nurǵısaevtyń aıtýynsha, aqyly qyzmet memlekettiń bekitken baǵdarlamasynan tys bilim berilgende ǵana kórsetiledi.
«Bir balaǵa 500 teńge degen az aqsha sııaqty. Biraq búkil oblys deńgeıinde alsaq bul táp-táýir aqsha. Onyń barlyǵy túbinde alyp kelgen kezde sybaılas jemqorlyqtyń tikeleı elementine jatady. Ol búgingi kúni mektep qabyrǵasynda uıymdastyrylǵan ata-analardan aqsha jınaý kórinisi»-, deıdi vedomstva basshysy.