Almaty oblysynyń batyr-polıtseıi memlekettik nagradamen marapattaldy
TALDYQORǴAN. QazAqparat - Qazaqstan Respýblıkasy Prezıdentiniń Jarlyǵymen polıtsııa maıory Erbol Amanbaev «Erligi úshin» medalimen marapattaldy. Memlekettik marapatty saltanatty túrde Іshki ister mınıstri Erlan Turǵymbaev tabystady, dep habarlaıdy QazAqparat tilshisi.
Maıor Amanbaevtyń erligi qyzmettik boryshyn oryndaýda kórsetken batyldyǵy berildi. Erjúrek ofıtser Almaty oblysy Tekeli qalasynyń polıtsııa basqarmasynda ýchaskelik polıtsııa ınspektorlary qyzmetin atqarady.
«Óz Otanymnyń ıgiligi úshin adal, ári múltkisiz qyzmetimmen qoǵamǵa kóp paıda ákele alatynyma senimdimin. Polıtsııa qatarynda árdaıym azamattarǵa kómekke kelýge jáne qylmysqa qarsy turýǵa daıyn óz isiniń naǵyz sheberleri qyzmet etedi», - deıdi Erbol Amanbaev.
Esterińizge sala keteıik, ýchaskelik polıtseı ótken jyldyń qarasha aıynda batyldyǵymen erekshe kózge túsken. Ol úıdegi órt týraly kórshisiniń habarlamasyna tez arada áreket ete otyryp, kóp páterli turǵyn úıden qart áıeldi alyp shyǵyp, qyzǵan gaz ballondardy syrtqa shyǵarǵan. Jarylys qaýpin joıý jáne ottyń odan ári taralýyn boldyrmaý maqsatynda, órt oshaǵyn joıǵan batyl polıtseıdiń qoldaryn kúıik shalǵan. Alaıda, ol qatty aýyrsynýdy sezinbesten, otty sóndirýdi jalǵastyryp, áriptestermen birge úı turǵyndaryn evakýatsııalaǵan.
Búgin tártip saqshysynyń barlyq týǵan-týystary, jaqyndary jáne tanystary, jergilikti jastar ony naǵyz batyr, ári batyl ofıtser retinde qurmetteıdi. Óziniń erekshe is-áreketimen qarapaıym polıtseı óskeleń urpaq úshin erliktiń jarqyn úlgisin kórsetti.
«Meniń ornymda kez kelgen adam osyndaı is-áreketke baratyn edi. Eger dál osyndaı jaǵdaı taǵy qaıtalanatyn bolsa, esh oılanbastan osy is-áreketimdi qaıta jasar edim», - dedi polıtsııa qyzmetkeri.
