Almaty oblysynyń bas sanıtarlyq dárigerine qatań sógis berý usynyldy
TALDYQORǴAN. QazAqparat - Kásipkerlerge «basymdy qatyrmańdar» degen Almaty oblysynyń bas sanıtarlyq dárigerine qatań sógis berý usynyldy. Endi ádep keńesiniń bul usynysyna baılanysty sheshimdi Densaýlyq saqtaý mınıstri Alekseı Tsoı qabyldaıdy, dep habarlaıdy QazAqparat tilshisi.
Jańa ǵana Taldyqorǵanda Almaty oblystyq bas sanıtarlyq dárigerdiń isi ádep keńesinde qaraldy.
Prezıdent Ákimshiligi jáne Densaýlyq saqtaý mınıstrligi tarapynan Erǵalı Sydymanovtyń halyqpen dóreki sóılesken áreketi boıynsha isti qaraý tapsyrylǵanyn ádep keńesiniń tóraǵasy Lıazzat Muqataıqyzy jetkizdi.
Keńes músheleriniń barlyǵy Erǵalı Sydymanovtyń áreketin talqylap, memlekettik qyzmetshi etıkasyn saqtamaǵany úshin qatań sógis berýdi usyndy.
Endigi kezekte bul usynysty Densaýlyq saqtaý mınıstri qaraıtyn bolady.
Esterińizge sala keteıik, Erǵalı Sydymanovtyń kásipkerlerge «basymdy qatyrmańdar» degen beınejazbasy jelige tarap, áleýmettik jeli qoldanýshylarynyń narazylyǵyn týdyrǵan bolatyn.
