Almaty oblysynyń baqtarynda 85 myń tonna alma óndiriledi

TALDYQORǴAN. QazAqparat - QR Aýyl sharýashylyǵy mınıstri Saparhan Omarov Almaty oblysyndaǵy alma baqtaryn aralap kórdi. Atap aıtqanda, óńir basshysy Amandyq Batalovpen Jambyl aýdanyndaǵy «Atek Agro» JShS jumysymen tanysty, dep habarlaıdy QazAqparat tilshisi.

Seriktestik kóktemde 54 gektar aýmaqqa 125 myń túp alma kóshetin otyrǵyzdy. Baqqa tolyǵymen tamshylatyp sýarý júıesi júrgizilgen. Munda ataqty «Pınk ledı», «Fýdjı», «Grennı smıt», «Gala», «Golden delıshes» alma sorttary ósirilýde. Kásiporyn basshysy Janat Altynǵadysulynyń aıtýynsha, tamshylatyp sýarý arqyly úsh jyldan keıin ár gektardan 30-45 tonna ónim jınaýǵa bolady. Tamshylatyp sýarý qondyrǵylary Izraılden ákelinse, alma kóshetteri Túrkııa elinen alynǵan. Qazirgi tańda baqtaǵy agrotehnıkalyq jumystardy túrik mamandary júrgizip jatyr.

«Jalpy bul joba úsh kezeńnen turady. Birinshi kezekte ónimdi ósirý, ekinshi kezeń uzaq ýaqytqa saqtaý jáne úshinshisi – óńdeý. Sondyqtan biz ónimniń bir bóligin jergilikti naryqta satyp, basym bóligin óndiriske jiberemiz», - deıdi Janat Altynǵadysuly.

Jobanyń quny 850 mln teńge. Qarajattyń bir bóligin «Agrarlyq nesıe korporatsııasy» AQ berse, bir bóligi sharýanyń jeke qarjysy. Alma baǵy 75 adamdy turaqty jumyspen qamtyp otyr.

Jalpy Almaty oblysynyń baý-baqsha aýmaǵy - 23 myń gektar. Ótken jyly jemis-jıdek jáne júzim baqtarynan barlyǵy 126 myń tonna ónim alyndy. Onyń ishinde 85 myń tonnasy – alma.