Almaty oblysynyń avtojoldaryna kúrdeli jóndeý júrgizilýde
ASTANA. QazAqparat - Ekonomıkanyń barynsha ózekti elementteriniń biri jol ınfraqurylymy ekendigi belgili. Osy rette Almaty oblysy jolynyń jaı-kúıi jaıynda QazAqparat tilshisine óńirdiń Jolaýshylar kóligi jáne avtomobıl joldary basqarmasynyń basshysy Erjan Jasybaev tarqata aıtyp berdi.
Aǵymdaǵy jyly jol jabyndysynyń ónimdiligin arttyrý jáne oblys joldaryn kútip ustaý úshin 16 mlrd teńgeden astam qarajat jumsaldy. Onyń ishinde respýblıkalyq bıýdjetten 4,8 mlrd, al jergilikti bıýdjetten 11,2 mlrd teńge bólingen. Búgingi kúngi jaǵdaı boıynsha óńirlik joldardyń 78 paıyzynyń jaı-kúıi jaqsy jáne qanaǵattanarlyq jaǵdaıda.
Oblystyq jolaýshylar tasymaly jáne avtomobıl joldary basqarmasynyń málimetine sáıkes, óńirdegi respýblıkalyq jáne oblystyq mańyzy bar kólik jolynyń uzyndyǵy 9637,8 shaqyrymdy quraıdy. Onyń 2850 shaqyrymy respýblıkalyq, 6138,6 shaqyrymy oblystyq jáne 649 shaqyrymy aýdandyq mańyzy bar.
Aǵymdaǵy jyly oblys ortalyǵynyń kóshe joldaryn kútip ustaýǵa jáne jóndeýge 3 mlrd teńgeden astam qarajat bólingen. Qalanyń uzyndyǵy 25,7 shaqyrymdy quraıtyn 28 kóshesine kúrdeli jóndeý jumystary júrgizilgen. Jumysshylar brıgadasy 14 kóshege ortasha jóndeý jumystaryn júrgizip, 51 kóshege qıyrshyq tas jabyndysyn tósegen. Munan bólek, qazirgi ýaqytta qalanyń 78 kóshesiniń asfalt jabyndysyn retke keltirý jumystary júrgizilip jatyr.
«Týrıstik klasterdi damytý maqsatynda óńirde kelesi jobalar ázirlenip, júzege asyryldy: «Aqshı aýylynan Alakól kólik jaǵalaýynda ornalasqan demalys aımaqtaryna deıin» avtomobıl joldary jańǵyrtyldy, sonymen qatar Balqash jaǵalaýyndaǵy demalys aımaqtaryna aparatyn «Almaty-Óskemen-Lepsi-Aqtoǵaı» avtojolynyń 0-110 shaqyrymyn, «Almaty-Óskemen-Qyz qaıyń-Lepsi» jolynyń 113-117 shaqyrymyn, «Lepsi-Balqash kóli» jolynyń 0-27 shaqyrymyn jańǵyrtý boıynsha jobalyq-smetalyq qujattama ázirlendi», - dep atap ótti Erjan Jasybaev.
Aıta keterligi, bıyl «Almaty-Óskemen-Lepsi-Aqtoǵaı», «Almaty-Óskemen-Qyzyl Qaıyń-Lepsi» avtomobıl joldary ýchaskesinde temir-beton qubyrlar tóseý, kópirler salý jumystaryna daıyndyq bastalyp ketken. Bul jumystardy 2020 jyly aıaqtaý josparlanyp otyr.
Oblys ortalyǵynyń Qazaqstan, Qabanbaı batyr, Gaýhar ana kóshelerine aǵymdyq jáne kúrdeli jóndeý jumystaryn júrgizip jatqan «Qalajolqurylys» JShS-nyń proraby Jandos Turysbekovtiń aıtýynsha, kompanııa bıyl 2,4 shaqyrym joldy jóndeý tenderin jeńip alǵan.
«Jartysyn jóndep úlgerdik. Asfalt ózimizdiń jergilikti zaýyttan shyǵady. Jumystardy 26 naýryzda bastaǵan edik, qazannyń sońyna deıin aıaqtaımyz degen josparymyz bar. Qazirgi ýaqytta 120 adam jumys istep jatyr, 38 tehnıka jumyldyrylǵan. Bul jerlerde kúrdeli jóndeý jumystaryn jasap jatyrmyz. Asfalttyń qalyńdyǵy 17 sm quraıdy», - dedi Jandos Turysbekov.
Jalpy oblys aýmaǵynda 39,2 shaqyrym avtomobıl jolyna kúrdeli jóndeý jumystaryn júrgizý josparlansa, qazirgi ýaqytta onyń 21 shaqyrymynda jumystar aıaqtalǵan. Atap aıtqanda, Qarasaı aýdanynda «Almaty-Shamalǵan-Uzynaǵash-Prýdkı-Qyrǵyzstan shekarasy, Shamalǵan stansasyna kire beris» jáne Jambyl aýdanynda «Almaty-Shamalǵan-Prýdkı-Qyrǵyzstan shekarasy, Jambyl mýzeıine kire beris» avtomobıl joldary tolyqtaı kúrdeli jóndeýden ótkizilip, paıdalanýǵa berilgen. Jobanyń jalpy quny 360 mln teńgeni quraıdy.
Oblysqa qarasty 17 aýdandyq jáne 2 qala mańy avtomobıl joldaryn jóndeýge jáne kútip ustaýǵa 2 mıllıon teńgeden astam qarajat bólingen.
Jergilikti bılik organdary taıaý ýaqytta basty kóshelerdi ǵana emes, sonymen qatar shetkeri joldardy da jóndeýge ýáde berip otyr.
