Almaty oblysynyń aýrýhanalarynda pandemııanyń ekinshi tolqynyna 5 280 oryn ázirlendi
TALDYQORǴAN. QazAqparat - Almaty oblysynda COVID-19 ósý qarqyny 0,2% qurady. Qazir aımaqta COVID-19 vırýsynyń yqtımal ekinshi tolqynyna daıyndyqty kúsheıtti, - dep habarlaıdy QazAqparat tilshisi.
Óńirde sońǵy aptada vırýstyń ósý qarqyny 0,2% qurady. Bul týraly «JETISÝ MEDIA» aqparattyq alańynda oblystyń bas dárigeri Ómirzaq Nııazbekov málimdedi.
Onyń aıtýynsha, qazirgi tańda statsıonarlyq emdeýde barlyǵy 149 adam bar. Onyń ishinde 33 adam ınfektsııalyq statsıonardyń 1 deńgeıinde, 109 adam ınfektsııalyq statsıonardyń 2 deńgeıinde em qabyldap jatyr.
«Oblys boıynsha koronavırýstyń ósý qarqyny táýligine de, sońǵy aptada da 0,2% qurady. Jalpy COVID-19 vırýsyn juqtyrǵan 5 204 naýqas tirkeldi, onyń 4 872 - i saýyǵyp shyqty, 81 -i emdelýde», – dedi ol.
Pandemııanyń yqtımal ekinshi tolqynyna 5280 tósek-oryn daıyndaldy. Іndetke qarsy turý maqsatynda oblys ortalyǵynda 200 tósek oryndyq modýldik ınfektsııalyq aýrýhana paıdalanýǵa berildi. Odan bólek Taldyqorǵan jáne Almaty qalalaryndaǵy kópsalaly aýrýhanalardyń bazasynda aýyr naýqastarǵa shuǵyl kómek kórsetý úshin zamanaýı jabdyqtarmen jabdyqtalǵan ortalyqtar quryldy. Sondaı–aq, balalar juqpaly aýrýlar aýrýhanalarynyń bazasynda balalarǵa arnalǵan eki COVID-ortalyǵy qosymsha jaraqtandyrylýda.
Oblystyń 13 aýrýhanasy ottegi stansasymen qamtamasyz etiledi. Onyń ishinde 12 ottegi stansasy jumys isteıdi. Qazirgi ýaqytta Sarqan aýdandyq aýrýhanasy stantsııaǵa qosylady. Budan basqa, 1070 ottegi kontsentratory satyp alyndy, daıyndalǵan 5 280 tósektiń 40% ottegimen qamtamasyz etiletin bolady.
