Almaty oblysynyń Alakól jaǵalaýyna Nur-Sultannan ushaq kúndelikti qatynaıdy

TALDYQORǴAN. QazAqparat - Búgin Nur-Sultannan bet alǵan 80 oryndyq «Bombardier DASH 8 Q400» ushaǵy Almaty oblysy, Úsharal qalasynyń áýejaıyna qondy. Ázirge bul baǵyt boıynsha ushaq aptasyna tórt ret qatynaıdy, dep habarlaıdy QazAqparat tilshisi.

Qazirgi tańda Úsharal áýejaıynda jumys jandanýda. Sondaı-aq búgin Almaty qalasynan 18 jolaýshy ushyp keldi. Keri baǵytqa 29 adam bılet alǵan.

Aıta keteıik, «Almaty – Úsharal – Almaty» (kúndelikti), «Nur-Sultan – Úsharal - Nur-Sultan» (aptasyna tórt ret) jáne «Taldyqorǵan – Úsharal - Taldyqorǵan» (kúndelikti) baǵyttary boıynsha áýe kemesi jolaýshylardy tasymaldaıdy. Al 1 maýsymnan bastap «Nur-Sultan- Úsharal – Nur-Sultan» ushaǵy kúndelikti qatynaıtyn bolady.

Bılet quny respýblıkalyq jáne oblystyq bıýdjetten sýbsıdııalanǵandyqtan, jolaýshylar úshin tıimdi. Mysaly, Nur-Sultannan Úsharalǵa bılet baǵasy – 16 myń teńge, Almatydan – 15 myń, al Taldyqorǵan qalasynan 8 myń teńge turady.

«Jolaýshylardyń qaýipsizdigi men jaıly sapary úshin barlyq jumys atqarylýda. Bizdiń qyzmetkerlerdiń barlyǵy biliktiligin arttyryp, arnaıy sertıfıkattaryn aldy. Qazirgi epıdemıologııalyq jaǵdaıǵa baılanysty barlyq sanıtarlyq talaptar saqtalatyn bolady»,- dedi «Jetisý» avıakompanııasynyń prezıdenti Qalmuhamet Dónsebaev.

Eske salaıyq, buǵan deıin Nur-Sultan men Almatydan Alakólge qatynaıtyn poıyz kesteleri bekitilgen bolatyn.