Almaty oblysynyń Aqsaı shatqalyndaǵy órtten jaqyn eldi mekenderge qaýip joq - TJD
NUR-SULTAN. QazAqparat - Almaty oblysynyń Aqsaı shatqalynda qurǵaq shóp áli órtenip jatyr. Jaqyn mańdaǵy eldi mekenderge tónip turǵan qaýip joq, dep málim etti Almaty oblystyq Tótenshe jaǵdaılar departamentiniń baspasóz qyzmeti.
«2021 jylǵy 29 qyrkúıekte saǵat 08-00-degi jaǵdaı boıynsha Almaty oblysy Qarasaı aýdanynyń Aqsaı shatqalyndaǵy «Іle-Alataý» MUTP aýmaǵyndaǵy bir ýchaskede azdaǵan byqsý jáne shymtezek tósenishiniń tútindeýi bar. Bul aımaqtyn aınalasynda jerdi qazý jáne jyrtý jumystary júrgizildi.
Órt ornynda Aqsaı orman sharýashylyǵynyń, Qazavıaormanqorǵaý jáne Almaty oblysynyń TJD kúshteri men quraldary jumys atqarýda. QR Tótenshe jaǵdaılar mınıstrliginiń «Qazavıaqutqarý» AQ tikushaǵy sý shashyp jatyr. Búgingi kúni tútindi joıýǵa 38 adam men 8 birlik tehnıka jumyldyryldy.
Eldi mekenderge qaýip joq. Eń jaqyn eldi meken – Qyrǵaýyldy aýyly 12 shaqyrym qashyqtyqta jáne Radýga baý-baqsha qoǵamy 8 shaqyrym qashyqtyqta ornalasqan»,-delingen habarlamada.
Esterińizge sala keteıik, 26 qyrkúıekten bastap Almaty oblysy Qarasaı aýdany, Aqsaı shatqalynda, «Іle-Alataý» MUTP aýmaǵyndaǵy jetýi qıyn taýly jerlerde, bıiktigi 2000 metr jerde orman tósenishi, japyraqtardyń jáne qurǵaq shóp órtengenin jazǵan bolatynbyz.
