Almaty oblysynyń Aqsaı shatqalynda qurǵaq shóp órtenip jatyr
NUR-SULTAN. QazAqparat - 2021 jyldyń 26 qyrkúıek kúni saǵat 18:20-da Almaty oblysynyń Tótenshe jaǵdaılar departamentine qurǵaq shóptiń órtengeni týraly habar tústi, dep habarlaıdy QazAqparat Almaty oblystyq Tótenshe jaǵdaılar departamentiniń baspasóz qyzmetine silteme jasap.
Kelip túsken aqparatqa qaraǵanda, oqıǵa Almaty oblysy, Qarasaı aýdany, «Іle-Alataý» MǴÓK aýmaǵyndaǵy, Aqsaı shatqalynan 8 shaqyrym jerdegi «Radýga» saıajaı qoǵamyna jetýi qıyn taýly aýmaqta, bıiktigi 2000 metr jerde bolǵan.
Aldymen 3 ga aımaqty alyp jatqan aǵashtardyń órtenýi baıqaldy.
Órt shyqqan jerge dereý Almaty oblysy TJD men Aqsaı orman sharýashylyǵynyń kúshteri men quraldary jiberildi.
28 qyrkúıek kúni saǵat 09-30-daǵy jaǵdaı boıynsha shatqaldan tútin shyǵyp jatyr.
Qazirgi tańda QR TJM «Qazavıaqutqarý» AQ tikushaǵy sý shashyp jatyr. TJD kúshimen jaqyn mańdaǵy aýdandyq bólimshelerdiń qyzmetkerlerinen, jergilikti atqarýshy organdardyń qyzmetkerlerinen qosymsha toptar quryldy.
Shtab Almaty oblysy TJD bastyǵy Asqat Toıchýbekovtyń basshylyǵymen uıymdastyryldy. Aerovızýaldy baqylaý úshin ushqyshsyz ushatyn apparaty bar jedel top-dron jiberildi.
Órtti sóndirýge Almaty oblysy TJD 7 tehnıkasy men 25 qyzmetkeri, Aqsaı orman sharýashylyǵynyń 70 qyzmetkeri men 15 tehnıkasy, QR TJM 28237 á/b 50 áskerı qyzmetkeri men 2 tehnıkasy, Qazavıaormanqorǵaý 10 qyzmetkeri, sondaı-aq QR TJM «Qazavıaqutqarý» AQ tikushaǵynyń 1 borty jáne 4 ekıpaj adamy jumyldyryldy.
Eldi mekenderge qaýip joq. Eń jaqyn eldi meken – Qyrǵaýyldy aýyly 12 km qashyqtyqta jáne «Radýga» baý-baqsha qoǵamy 8 km qashyqtyqta ornalasqan.
