Almaty oblysynyń ákimi jýrnalısterdi marapattady
ASTANA QazAqparat - Baılanys jáne aqparat qyzmetkerleriniń kúnine oraı oblys ákimi Amandyq Batalov jýrnalısterdi merekesimen quttyqtady. Birqatar BAQ ókilderine qurmet gramotalary men alǵys hattar jáne basqa da arnaıy marapattar tapsyryldy. Jalpy jıynǵa aýdandyq, oblystyq jáne respýblıkalyq BAQ ókilderiniń 200-ge tarta ókili men blogerler, ardager jýrnalıster qatysty, dep habarlaıdy oblystyq ákimdiktiń baspasóz qyzmeti.
Oblys ákimi Amandyq Batalov tilshiler qaýymyna arnaǵan quttyqtaý sózinde buqaralyq aqparat quraldarynyń qoǵamdaǵy mańyzyn atap ótip, óńirdiń áleýmettik-ekonomıkalyq damýyna, memlekettik baǵdarlamalardyń oryndalý barysyna toqtaldy.
- Qurmetti jýrnalıster! Gazet, teledıdar, ınternet keńistigi - ýaqyt aınasy. Ol arqyly kún saıyn tyń derekter alyp, memleketimizdiń damýyn, oblysymyzdyń tynys-tirshiligin qadaǵalap otyramyz. Oblystaǵy, ár aýdan, qaladaǵy jańa bastamalar, jarqyn ister nemese tosyn oqıǵalar tilshiler qaýymynyń nazarynan tys qalǵan emes. Árqashan eńbekterińiz jemisti, merekelerińiz qutty bolsyn! - dedi óz quttyqtaýynda A. Batalov.
Osy jıynda kásibıligi, memlekettik aqparattyq saıasatty júzege asyrýdaǵy belsendiligi úshin birqatar jýrnalıster marapatqa ıe boldy. Máselen, «Jetisý» gazetiniń betteýshi-dızaıneri Saqyp Tókeeva QR Aqparat jáne kommýnıkatsııalar mınıstrliginiń «Aqparat salasynyń úzdigi» tósbelgisimen marapattalsa, Eńbekshiqazaq aýdandyq «Eńbekshiqazaq» gazetiniń bas redaktory Haırolla Ahmetjanovqa Qazaqstan Jýrnalıster odaǵynyń «Qazaqstannyń Qurmetti jýrnalısi» qurmet belgisi berildi. Sonymen qatar 4 tilshi oblys ákiminiń jáne QR Aqparat jáne kommýnıkatsııalar mınıstrliginiń Qurmet gramotasy men Alǵys hatyna ıe boldy.
