Almaty oblysynyń ákimi jetistikke jetken óńir jastarymen kezdesti
TALDYQORǴAN. QazAqparat - Búgin Almaty oblysynyń ákimi Amandyq Batalov bıylǵy jyly úlken jetistikke jetken, aıtýly sharalarda júldege ıe bolǵan jas daryndardy qabyldady. Olardyń qatarynda memlekettik «Daryn» jastar syılyǵynyń, halyqaralyq «Rýh», «Altyn dombyra», «Men qazaqpyn» jáne basqa da baıqaýlardyń jeńimpazdary bar, dep habarlaıdy QazAqparat oblys ákiminiń baspasóz qyzmetine silteme jasap.
Kezdesý barysynda óńir basshysy oblysta jyl ishinde atqarylǵan sharalar, qolǵa alynyp jatqan irgeli jobalar týraly aıtyp berdi. Sonymen qatar «Rýhanı jańǵyrý» baǵdarlamasynyń júzege asyrý barysyna toqtalyp ótti.
«Jańa jyldy qarsy alyp, ótken jyldaǵy jumysty qorytyndylar shaqta sizdermen kezdesip otyrǵanyma qýanyshtymyn. Jalpy bul jyl oblys úshin jaqsy jańalyqtarǵa toly boldy. Biz úshin áleýmettik-ekonomıkalyq damýmen qatar qoǵamnyń rýhanı damýy da asa mańyzdy. Sizderdiń árqaısylaryńyz osy jyly óz salalaryńyzda úlken jetistikterge jetip, joǵary marapattarǵa ıe boldyńyzdar, túrli respýblıkalyq, halyqaralyq konkýrstarda jeńiske jettińizder. Sizderdi taǵy da óz atymnan jáne Jetisý jurtshylyǵynyń atynan quttyqtaımyn», - dedi Amandyq Batalov.
Kezdesýge qatysýshylar ózderine qoldaý bildirgeni jáne óńirde mádenıet pen ónerdiń damýyna barlyq jaǵdaıdy jasap otyrǵany úshin oblys ákimine rızashylyqtaryn bildirdi. Memlekettik «Daryn» jastar syılyǵynyń ıegeri, jas ǵalym Eldos Toqtarbaı bıylǵy jyly oblys ákimdiginiń qoldaýymen birqatar jastardyń kitaptary jaryq kórgenin, bul óz kezeginde ádebıetti qoldaýǵa jasalǵan zor qamqorlyq ekenin atap ótti.
Basqosýda jas ónerpazdar ózderiniń bolashaq josparlary jaıynda baıandady jáne usynystary oblys basshylyǵy tarapynan qoldaý tapty.
A. Batalov kezdesý sońynda qoǵamdyq sanany jańǵyrtý bir jyldyń jumysy emes ekenin, oǵan zııaly qaýymnyń jas ókilderi de úles qosýy tıis ekenin atap ótti. Jas daryndarǵa shyǵarmashylyq tabys tilep, jetistikterge jete berýlerine tilektestigin bildirdi.
