Almaty oblysynyń ákimi jastarmen fýtbol oınady
TALDYQORǴAN. QazAqparat - Búgin Taldyqorǵandaǵy «Jetisý» ortalyq stadıonynda Sport kúni aıasynda «Jetisý» fýtbol ortalyǵynyń tárbıelenýshileri men fýtbol klýbynyń negizgi quramy arasynda joldastyq kezdesý ótti. Jasóspirim fýtbolshylar komandasy quramynda oblys ákimi Amandyq Batalov oınady, dep habarlaıdy QazAqparat oblysy ákiminiń baspasóz qyzmetine silteme jasap.
Almaty oblysynyń ákimi oıyn aldynda «Jetisý» kásibı fýtbol klýbynyń kúrdeli jóndeýden ótken jataqhanasynda bolyp, qurylys jumysynyń sapasyn tekserdi. Osydan keıin óńir basshysy A. Batalov saltanatty sharaǵa qatysýshylardy Sport kúnimen quttyqtap, oblysymyzda sporttyń damýy jaıyna toqtaldy.
«Memleket basshysy Nursultan Ábishuly Nazarbaev otandyq sportty damytý týraly sóz qozǵaǵanda, balalar sportyna úlken kóńil bólý qajettigin únemi erekshe atap ótedi. Osy baǵytta memlekettik qoldaýdyń arqasynda nátıjeli ister atqarylýda. Jas sprotshylardyń súıikti sport túrimen tolyqqandy aınalysýyna jan-jaqty jaǵdaı jasalýda. Sonyń ishinde fýtbolǵa da zor kóńil bólinýde. Álem boıynsha mıllıondaǵan adamdardyń súıikti oıyny sanalatyn fýtbolmen bizdiń oblysymyzda 111 myń adamnyń aınalysatyndyǵy qýantady. Solardyń ishinde ózderińiz sııaqty áýesqoı jas sportshylarymyz da bar. Sizderdiń aralaryńyzdan bolashaqta joǵary sanatty kásibı fýtbolshylardyń shyǵatyndyǵyna senimdimin. Barshańyzdy sport kúnimen taǵy bir márte quttyqtaı otyryp, sizderge joǵary sporttyq nátıjeler men jetistikter tileımin. Sportpen shuǵyldanyp, salýatty ómir saltyn ustanyńyzdar!», - dedi A. Batalov.
Quttyqtaý sózinen keıin óńir basshysy balalarǵa 200 fýtbol dobyn tabystady. «Jetisý» fýtbol ortalyǵynyń jas tárbıelenýshileriniń atynan Baǵdáýlet Ámirsenov sóz sóılep, balalardyń súıikti isimen aınalysýyna qajetti múmkindikterdiń jasalyp jatqandyǵy úshin óńir basshysyna alǵysyn bildirip, 7 nómirli fýtbol formasyn syılady. Osydan keıin kópten kútken joldastyq kezdesýdiń bastaldy. Tartysqa toly ótken oıyn kórermenderge de, oıynshylardyń ózderine de unady. Oıyn ótkir shabýyldarǵa toly boldy. Jas fýtbolshylar fýtbol ortalyǵynda osy kúnge deıin alǵan bilimderin is júzinde kórsete bildi. Oıyn fýtbol ortalyǵy tárbıelenýshileriniń paıdasyna 4:1 esebimen aıaqtaldy.
Aıta ketý kerek, búgine oblysta 22 stadıon men 870 astam fýtbol alańdary sport súıer azamattardyń ıgiligine qyzmet etýde.
