Almaty oblysynyń ákimi janar-jaǵarmaı men azyq-túliktiń baǵasyn retteýdi jáne balabaqsha problemasyn sheshýdi tapsyrdy
TALDYQORǴAN. Qarashanyń 19-y. QazAqparat /Sandýǵash Dúısenova/ - Almaty oblysynyń ákimi Serik Úmbetov Elbasymen bolǵan tikeleı efırdegi kezdesýden keıin oblystyq selektorlyq keńeste jumys tobyna birqatar tapsyrmalar berdi.
Atap aıtqanda, janar-jaǵarmaı men azyq-túlik baǵalaryn retteýdi, balabaqsha problemalaryn sheshýdi tapsyrdy.
Birinshi máselege toqtalǵan Serik Úmbetov, aı saıyn oblystyń benzınge degen suranysy 28 myń tonna mólsherinde qanaǵattandyrylyp otyrǵanyn atap kórsetti. Biraq ta, benzın baǵasynyń respýblıka boıynsha 12 paıyzǵa jáne oblys boıynsha 5,4 paıyzǵa ósýine baılanysty, S.Úmbetov aýdandar men qala ákimderine janar-jaǵarmaı baǵasyn kúndelikti qadaǵalaıtyn jáne munaı ónimderin jetkizýshilermen jumys isteıtin jumys toptaryn qurýdy mindettedi.
Al azyq-túlik baǵasyna qatysty ákim, ótken jyldyń sáıkes kezeńimen salystyrǵanda 2009 jyldyń 10 aıynda áleýmettik taýarlardyń baǵasy 44 paıyzǵa tómendegenin habarlady. Biraq ta, oblys ortalyǵynda bólke nannyń baǵasy 43-45 teńge tursa, keıbir aýdandarda onyń baǵasy 45-50 teńgeni qurap otyr. Oblysta astyqtyń da, un men dıirmenniń de jetkilikti bolǵanyna qaramastan osyndaı jaǵdaı oryn alýda.
S.Úmbetov baǵalar men tarıfterdi turaqtandyrý jáne aýdandarda shtabtardyń jumys belsendiligin arttyrý jónindegi is-sharalardyń josparyn eki kúndik merzimde daıyndaý týraly tapsyrma berdi. Shtab kún saıyn baǵa monıtorıngin júrgizip, ónim jetkizýshilermen araǵaıyndarsyz jumys isteýleri kerek.
Ákim sondaı-aq balabaqshalardyń jaǵdaıyna taldaý jasaýdy tapsyrdy. «Aǵymdaǵy jyly oblysta 12 balabaqsha salynýda, kelesi jyly taǵy 14 baqsha salynady, biraq osynyń ózi suranysty qanaǵattandyra almaıdy. Sondyqtan da, kezinde jekeshelendirilip ketken balabaqsha ǵımarattarynyń ıelerimen nysandardy kommýnaldyq menshikke qaıtarý máselesin sheshý kerek», deıdi ákim.
