Almaty oblysynyń ákimi sý basqan aýyldarǵa bardy
TALDYQORǴAN. QazAqparat - Almaty oblysynyń ákimi Amandyq Batalov sý basqan aýyldarǵa ózi bardy. Óńir basshysy úsh aýdanda bolyp, ondaǵy ahýalmen tanysty, dep habarlaıdy Qazaqparat tilshisi.
Talǵar aýdanyndaǵy Tuzdybastaý aýylynda erigen qar sýynan birqatar úılerdiń aýlasyna sý kirgen. Jaǵdaıdy saraptaǵan ákim jumys istep jatqan tehnıka sanyn kóbeıtýdi tapsyrdy. Kerek bolsa órt sóndirý kólikterin de sý sorýǵa jumyldyrý qajettigin aıtty.
Qarasaı aýdanynda Amandyq Batalov Qyrǵaýyldy jáne Abaı eldi mekenderine at basyn burdy. Bul jerde qazir erigen qar sýynyń saldaryn joıýǵa 3 ekskavator men júk kóligi jáne 25 adam jumys istep jatyr. Aryqtardyń arnalary tereńdetilip, jaǵasy qum salynǵan qaptarmen bógetter turǵyzylýda. Qutqarýshylar muqtaj turǵyndardyń bárine kómek kórsetýde.
Aýdan ortalyǵy Qaskeleń qalasynda oblys ákimine aýdan ákiminiń orynbasary, tótenshe jaǵdaılar boıynsha aýdandyq komıssııa tóraǵasy Nurjan Satýbekov esep berdi. Qala kósheleri men aýlalaryna jınalǵan sýdan tazartý jumystaryna 100-ge jýyq adam jumyldyrylǵan. 10-shaqty tehnıka toqtaýsyz jumys isteýde. Nurjan Satýbekov Shamalǵan aýylynda da sý basqanyn aıtyp ol jerde de jumys kúsheıtilgenin jetkizdi. Qyzyl sý aýyl mańyndaǵy alqaptarǵa baǵyttalyp, 80 adam jumys istep jatqanyn málimdedi.
Keshe keshke qaraı Jambyl aýdany tótenshe jaǵdaı jarııalaǵan bolatyn. Óńir basshysy ózgelerden kóbirek zardap shekken Qaınazar aýylynda da boldy. Qutqarýshylar men ulttyq gvardııa jaýyngerleriniń jyldam qımyldaǵanynyń arqasynda sý aýyldan tys baǵytqa buryldy. Amandyq Batalov sý kirgen birneshe úıde bolyp turǵyndarmen kezdesti. Áńgime barysynda bul baspanalar eshqandaı ruqsatsyz salynǵany anyqtaldy. Eki úıdiń de qujattary tolyq bolmaı shyqty. Birinde jalǵyz basty ana, ekinshisinde sozylmaly aýrýmen aýyratyn naýqas turyp jatyr. Eki otbasynyń aýyr jaǵdaıy eskerilip, oblys ákimi aýdan basshylaryna zardap shekkenderge barlyq qajetti kómek kórsetýdi tapsyrdy.
Arnaıy qurylǵan komıssııa úı-úıdi aralap, qyzyl sýdan zardap shekkenderdiń tizimi jasalatyn boldy. Óńir basshysy sapardy qortyndylaı kele jaǵdaı tolyq saralanyp, akt jasalǵannan keıin qajetti kómek kórsetiletinin tilge tıek etti.
