Almaty oblysynyń ákimi Prezıdentke 200-ge jýyq aýyldyń aýyz sýǵa zárý ekenin jetkizdi
TALDYQORǴAN.QazAqparat - Almaty oblysyna jumys saparymen kelgen Qasym-Jomart Toqaevqa Amandyq Batalov óńirdegi ózekti máseleler jaıly baıandady, dep habarlaıdy QazAqparat tilshisi.
«Bizdiń oblys óte úlken. 732 eldi meken bar. Basqa óńirlermen salystyrǵanda aýyz sýmen qamtý deńgeıi joǵary. 86 paıyzǵa jetti. Biraq oblys úlken bolǵandyqtan 200-ge jýyq aýyl áli taza aýyz sýǵa qol jetkize almaı otyr. Ekinshi ózekti másele bizde úshaýysymdy mektepter sany azaımaı tur. Sebebi, demografııalyq ahýal jyldan-jylǵa ósýde. Bir jylda 50 myńǵa jýyq sábı dúnıege keledi. Qazir 14 mektep salynyp jatyr. Al 20 mekteptiń jobalyq-smetalyq qujattaryn daıyndap, úkimetke ótkizdik. Eger bul másele sheshimin tapsa, biz úshin úlken kómek bolar edi», dedi Almaty oblysynyń ákimi Amandyq Batalov Prezıdentpen kezdesý barysynda.
Oblys ákimi jańa mektepterdi salýǵa 29 mlrd teńge qajet ekenin jetkizdi.
Esterińizge sala keteıik, Prezıdent Taldyqorǵandaǵy Saltanat saraıynda jurtshylyqpen kezdesip, erkin formatta tildesti. Kezdesý barysynda Prezıdent Almaty oblysynyń ákimine apatty joldardy jóndeýdi tapsyrǵanyn habarlaǵan bolatynbyz. Sonymen qatar Prezıdent járdemaqy alyp, jumys istegisi kelmeıtinderdi anyqtaý qajet ekenin jetkizdi.
