Almaty oblysynyń ákimi nelikten elordada em alyp jatyr - mınıstrlik túsindirmesi

NUR-SULTAN. QazAqparat - QR Densaýlyq saqtaý vıtse-mınıstri Ajar Ǵınııat koronavırýs juqtyryp alǵan Almaty oblysynyń ákimi Amandyq Batalovtyń em alý úshin elordadaǵy Kardıohırýrgııalyq ortalyqqa aýystyrylý sebebin túsindirdi, dep habarlaıdy QazAqparat tilshisi.

Vıtse-mınıstr Ortalyq kommýnıkatsııalar qyzmetindegi brıfıng barysynda málim etkendeı, Amandyq Batalovtyń densaýlyǵy nasharlap ketkennen keıin ol astanadaǵy Ulttyq ǵylymı kardıohırýrgııa ortalyǵyna jetkizilgen. Óıtkeni, bul ortalyq indet kezinde respýblıkalyq ekstrakorporaldy membrandy oksıgenaza kezindegi qarqyndy terapııa ortalyǵy bolyp qaıta jasaqtalǵan edi.

«Bul ádis ókpeni jasandy jeldetý kómek kórsetpeıtin kezde qoldanylady. Ortalyq júrek-qan tamyrlary aýrýlary aıasynda aýyr tynys alý jespeýshiligi órshigen naýqastardy qabyldaıdy», - dedi Ajar Ǵınııat.

Esterińizge sala ketsek, 22 maýsym kúni Almaty oblysynyń ákimi Amandyq Batalovtan koronavırýs anyqtalǵany habarlanǵan edi.

Keıin áleýmettik jelide óńir basshysy Taldyqorǵan qalasyndaǵy kópsalaly aýrýhananyń bir bóliminde jalǵyz jatqandyǵy týraly aqparat tarady. Biraq ákimniń baspasóz qyzmeti muny joqqa shyǵardy.