Almaty oblysynyń ákimi qurylysshylarǵa kemshilikterdi túzeýge bir apta berdi
TALDYQORǴAN.QazAqparat - Búgin Almaty oblysynyń ákimi Amandyq Batalov Taldyqorǵandaǵy qurylys nysandaryn aralaý barysynda Saltanat saraıy men Kórme pavılonynyń abattandyrylýyna qatysty keıbir kemshilikterdi túzeýge bir aptalyq merzim berdi. Atalmysh eki nysan jaqyn kúnderi paıdalanýǵa berilmek, dep habarlaıdy QazAqparat tilshisi.
Saltanat saraıy men Kórme pavılony iske qosýǵa daıyn, ishki árleý jumystary da aıaqtalǵan. Tek aýmaqty abattandyrýdyń keıbir detaldary áli de jetildirýdi qajet etedi. Amandyq Batalov osy eki nysannyń arasyna jol salýdy, Kórme pavılonynyń baspaldaqtaryn retke keltirip, ǵımarat ishinde kıim iletin oryndy aýystyrýdy tapsyrdy.
«Saltanat saraıy da, Kórme pavılony da - kóp salaly keshender. Olar tek neke qııý men kórme ótkizýge ǵana laıyqtalyp salynǵan joq, munda oblystyq, respýblıkalyq mańyzdaǵy túrli sharalar da uıymdastyrylatyn bolady. Bular qalamyzdyń kórnekti oryndaryna aınalýy tıis. Sondyqtan mundaǵy árbir detal, árbir shtrıh keshenderdiń beınesine tolyq úılesimde bolýy tıis. Bularǵa jaqyn ornalasqan ǵımarattar da, turǵyn úıler de biryńǵaı sáýlettik stıl qalyptastyryp turýy qajet», - dedi A. Batalov.
Bul máselelerdi oblystyq qurylys basqarmasyna baqylaýda ustaý eskertildi. Budan soń oblys ákimi «Jastar» saıabaǵynda ornalasqan «Rýhanı jańǵyrý» ortalyǵyn aralap kórdi.
«Dızaınerlerdi, árleýshi sýretshilerdi shaqyryp, árbir iske shyǵarmashylyq turǵydan qaraý kerek. Kirgen adamǵa alǵashqy áser beretin holdyń jaryqtandyrylýy áli de jetkiliksiz. Holl jaryq ta áserli, tartymdy bolýy kerek. Vıtraj jasaý kerek pe, álde qabyrǵaǵa sýret salý kerek pe, ony arnaıy mamandarmen aqyldasý qajet. Ǵımarattyń syrtqy kelbeti tolyq daıyn, dese de ishki kórkemdeý jumystary da mazmunyna saı bolýy kerek», - deı kele A. Batalov óziniń orynbasarlaryna tapsyrmalar berdi.
Sonymen qatar óńir basshysy ǵımarat ishindegi kórme zalynyń usynylǵan dızaınyn qaıta jasaýdy tapsyrdy. Jalpy «Rýhanı jańǵyrý» ortalyǵy qarasha aıynyń aıaǵynda paıdalanýǵa beriledi dep josparlanyp otyr.
