Almaty oblysynyń ákimi qurylys nysandarynyń jumysymen tanysty
TALDYQORǴAN. QazAqpart - Almaty oblysynyń ákimi Amandyq Batalov Taldyqorǵan qalasynda qurylysy júrip jatqan birneshe nysandy aralady. Eń aldymen qalanyń áýe qaqpasy sanalatyn áýejaıdyń jańǵyrtý jumystaryn kórýden bastady.
Salynyp jatqan arnaıy kólikter turaǵynyń qurylysymen tanysyp, áýejaı qasbetiniń sáýlettik sheshimi, ǵımarat syrtynyń jobalyq sheshimi qandaı bolatynyna qazirden nazar aýdarýdy tapsyrdy. Áýejaı ǵımaratynyń jylytý júıeleriniń jumysyna, ǵımarattyń syrtqy jaryqtandyrylýyna qatysty birqatar syn aıtty.
Aımaq basshysy Shyǵys shaǵyn aýdanynda ornalasqan «Taldyqorǵan» ındýstrıaldy aımaǵyna da bardy. Munda ınjenerlik-kommýnıkatsııalyq júıelerdi salý, kásiporyndardyń ornalasý, jabdyqtalý deńgeıi týraly oblystyq kásipkerlik jáne ındýstrıaldy ınnovatsııalyq damý basqarmasynyń basshysy M. Murat tanystyrdy. Onyń aıtýynsha, temir jol qurylysy qarashanyń basynda aıaqtalady. Sol sııaqty elektrlendirý, sýmen qamtý, káriz júıelerin jasaý jumysy da aıaqtalýǵa jaqyn. Telefon baılanysy jelileri tolyǵymen júrgizilip bolǵan. Oblys ákimi osy ónerkásip aýmaǵynda qurylysy esh qozǵaýsyz toqtap turǵan ǵımarattardyń ıelerimen iskerlik baǵytynda áńgimelesý júrgizýdi tapsyrdy. Sonymen qatar ındýstrıaldy aımaqqa alyp baratyn trotýardyń sapasyz tóselip jatqanyna syn aıtyp, qaıtadan sapaly etip tóseýge tapsyrma berdi.
«Qaratal» shaǵyn aýdanyndaǵy burynǵy basseın aýmaǵynda da qazir qurylys jumystaryna daıyndyq júrip jatyr. Munda zamanaýı basseın salynyp, dál ortasynan 25-30 metr bıiktikke deıin sý kókke shapshıtyn sýburqaq ornatylmaq. Sýburqaq túnde túrli túske boıalyp, jaryq shashyp turady. Bul aımaqta da bolǵan oblys ákimi A. Batalov basseın mańyna asfalt tósep, avtokólik toqtaıtyn orynǵa laıyqtaý, jaǵalaýǵa shaǵyl qum tógý, kıinetin oryn, dárethana sekildi barlyq qajetti oryndardyń qarastyrylýy qajettigin aıtty. Mańaıyndaǵy qýraǵan aǵashtardy ǵana kesip, retke keltirý jaıy da sóz boldy.
Ortalyq alań janyndaǵy skver de qaıta jóndeýden ótkizilip jatyr. Oryndyqtar jańalanyp, totyǵý saldarynan beti aqtańdaqtanyp ketken mramor tósemderi aýystyrylýda. Jumystardy sapaly jasaýdy qadap tapsyrǵan oblys basshysy Mádenıet saraıynyń syrtqy kelbetin saqtaı otyryp, jańalaý qajettigin eskertti.
Munan soń Abaı men Qabanbaı batyr kósheleriniń qıylysyndaǵy ákimshilik ǵımaratynyń jóndeý jumystarymen tanysty. Bul - 1948 jyly salynǵan ǵımarat. Munda qalpyna keltirý jumystaryn júrgizip jatqan «Aýyl Qurylys» JShS ár qabattyń ortasyna qoıylǵan tozyǵy jetken aǵash balkalardy shvellermen aýystyryp, ǵımaratty jańalaýda. «Mundaı tarıhı ǵımarattardy saqtap qalýymyz kerek. Jańǵyrtylyp, jańa keıipke ıe bolǵan ǵımaratqa oblystyq basqarmalar ornalasatyn bolady», - dedi A. Batalov.
Arbattyń boıyn aralap, «Asyl taý» JShS júrgizgen kóriktendirý jumystaryn kórdi. Birjan sal men Aqyn Sara kósheleriniń aralyǵyndaǵy Táýelsizdik kóshesiniń boıyndaǵy skverdi osy keıpin saqtaı otyryp, jańalaýdy tapsyrdy.
Qalanyń ońtústikke shyǵatyn úlken dańǵylyn AKL bazaryna deıingi abattandyrý isinde de birqatar olqylyqtardy atap kórsetti. Eskertýler jaryqtandyrý, qaraǵaı egý men gúl otyrǵyzý jıiligi, trotýarlardyń sapasy, oryndyqtardyń túsine qatysty aıtyldy.
Sonymen qatar oblys basshysy irgesi qalanyp jatqan jańa drama teatrynyń, Saltanat saraıynyń qurylys jumystarymen de tanysty. Atalmysh ǵımarattardy turǵyzýmen «BI GROUP» kompanııasy aınalysýda. Qurylys jumystarynyń barysymen kompanııa ókili A. Tursynjanov habardar etti. Saltanat saraıynyń syrtqy keıpi, holl, 1-shi jáne 2-shi zaldary, meıramhanasynyń jobalaryn kórsetti.
Oblys ákimi A. Batalov qalanyń tıisti qurylymdaryna Saltanat saraıy men drama teatrynyń arasyna túsetin jańa kósheniń qurylysyn da erte kóktemnen bastaýdy tapsyrdy.
- Jalpy, qurylys jumystarynyń qarqyny jaman emes. Jumystyń bet alysyn baıqaý maqsatymen osylaı aralap kórip turatyn bolamyz. Taldyqorǵan eń ádemi qalalardyń qatarynda bolýy kerek. Qalanyń estetıkalyq kelbetin saqtaý úshin árbir turǵyn da óz úlesin qosýy qajet. Zańsyz qurylysqa jol bermeńizder, prıntsıpshil bolyńyzdar, - dedi A. Batalov qorytyndy sózinde.
