Almaty oblysynyń ákimi ınvestorlarmen kezdesti
Amandyq Batalov «HOME MART» kompanııasynyń bas dırektory Erlan Muqashevpen, «Allel Agro» AQ basqarma tóraıymy Razııa Jataqpaevamen jáne «Energomost» konsortsıýmy dırektorlar keńesi tóraǵasynyń orynbasary Lılııa Nammen kezdesti.
Kezdesý barysynda «Aport» ortalyǵy qurylysynyń 3-shi kezeginiń ınvestıtsııalyq jobasy týraly Erlan Muqashev aıtyp berdi.
E. Muqashevtiń aıtýynsha, 3-shi kezeginiń qurylysy 40 myń sharshy metr alańda Qarasaı aýdanynyń aýmaǵynda júrgizilýde. Investıtsııa kólemi - 10 mlrd teńge kóleminde. 3-shi kezektegi qurylys jumystarynyń nátıjesinde ortalyqtyń jalpy alańy 150 myń sharshy metrdi, jalpy ınvestıtsııa kólemi 30 mlrd teńgeni quramaq.
Oblys ákimi A. Batalov óz kezeginde mundaı deńgeıdegi saýda ortalyǵyn Taldyqorǵan qalasyna da, atap aıtqanda ońtústik-batys turǵyn aýdanǵa salý qajettigin aıtty.
E. Muqashev bul usynysty jáne onyń sheshimin izdeý joldaryn qarastyrýǵa daıyn ekendikterin jetkizdi. Bul máselede oblys ákiminiń tapsyrmasymen qala ákimdigi de qoldaý kórsetetin bolady.
«Allel Agro» AQ jumysy týraly atalmysh kompanııanyń basqarma tóraıymy Razııa Jataqpaeva áńgimeledi.
Oblys aýmaǵynda búgingi kúni jalpy jylyna 55 myń tonna qus etin daıyndaıtyn qýattylyqqa ıe, broıler ósiretin 3 qus fabrıkasy, kombıkorm zaýyty, uıadan basyp shyǵaratyn qus fabrıkalary, ınkýbatorlar, 2 et óńdeý zaýyty jumys jasaıdy.
R. Jataqpaevanyń aıtýynsha, qazirgi kezde Talǵar aýdanynyń Panfılov aýylyna jaqyn mańda kompanııa soıylǵan mal etiniń kólemin jylyna 70 myń tonnaǵa jetkize alatyn mal soıý tsehyn salýdy josparlap otyr. Oǵan qajetti barlyq qural-jabdyqtar satyp alynǵan.
Jıynda aıtylǵandaı, Almaty oblysy qus etin óndirýde elimiz boıynsha kóshbasynda tur, naryqtaǵynyń 45%-in nemese jylyna 83 myń tonna et óndiredi.
«Energomost» konsortsıýmynyń oblysta júzege asyryp jatqan jobalary jaıynda konsortsıým dırektorlar keńesi tóraǵasynyń orynbasary Lılııa Nam baıandap berdi.
L. Namnyń aıtýynsha, óńirde konsortsıým úsh baǵytta jumys istep keledi. Bul oraıda Aqsý qant zaýytyn jańǵyrtý, gıdroenergetıkalyq jáne sý sharýashylyǵy keshenderin aıtýǵa bolady. Konsortsıým ırrıgatsııalyq júıelerimen birge Pokatılovka sý qoımasynyń qurylysyn da júzege asyrýdy qolǵa alyp otyr.
Jıyndy qorytyndylaǵan oblys ákimi Amandyq Batalov sóz etilgen jobalardyń barlyǵy da oblys úshin asa mańyzdy ekenin, sonyń negizinde jańa jumys oryndary ashylyp, bıýdjetke salyq túsimi turaqtanatynyn, jalpy alǵanda óńirdiń áleýmettik-ekonomıkalyq damý deńgeıi jaqsara túsetinin atap ótti.