Almaty oblysynyń ákimi Batalov: Jastarǵa 10 gektardan jer bólinedi
Taldyqorǵanda Almaty oblysy ákiminiń qatysýymen Jastar jylynyń saltanatty ashylý jıyny ótti. Basqosýǵa ár salada eńbek etip júrgen óńir jastary, halyqaralyq jarystarda top jaryp júrgen sportshylar, eriktiler men oblystyq departament basshylary qatysty.
Jınalǵandardy Jastar jylynyń bastalýymen quttyqtaǵan óńir basshysy Amandyq Batalov 2019 jyldyń «Jastar jyly» dep atalýynyń tarıhı máni zor ekendigin atap ótti.
Búgingi tańda Almaty oblysynda Jetisý jastarynyń jarqyn isteri atty jumys jospary qurastyrylǵan. Ol jerde Jastar jyly aıasynda atqarylatyn is-sharalar bekitilip, naqty qadamdar belgilengen. Máselen Almaty oblysynyń barlyq aýdan, qalalarynda Jastarǵa qyzmet kórsetý ortalyqtaryn salý máselesi qarastyrylýda. Óńirde aýylsharýashylyǵyn damytyp, aýyl jastaryn jumyspen qamtý maqsatynda ár resýrstyq ortalyqqa 10 gektardan jer bólinbek. Bul jerlerde jastar ártúrli daqyldar egip, ósirip, shyqqan ónimdi ótkizip, odan túsken qarajatty aýyldy kórkeıtýge baǵyttaıtyn bolady.
Almaty oblystyq jastar resýrstyq ortalyǵynyń jetekshisi Jandos Baıhamıtovtiń aıtýynsha daqyl tańdaýda ár aýdannyń klımattyq jaǵdaıyna basymdyq beriledi.
«Máselen Sarqan aýdanynda qant qyzylshasy, Raıymbek aýdanynda kartop ósiriledi. Kúzgi jıyn terinnen túsken qarajatqa street workout alańdary salynyp, koýorkıng ortalyqtaryna qajet jabdyqtar alynady», - deıdi ortalyq jetekshisi.
Sondaı-aq Elbasy tapsyrmasyn júzege asyrý maqsatynda volonterlyq qozǵalysty damytyp, belsendi jumys istegen erikti stýdentterge shákirtaqy 30 paıyzǵa artady. Prezıdenttiń 5 áleýmettik bastamasy sheńberinde 2018-2019 jyldary jergilikti bıýdjetten 106 grant bólinip otyr. 2020 jylǵa deıin 2 000 stýdentke jataqhana salynady.
