Almaty oblysynyń ákimi ardagerlermen júzdesti
TALDYQORǴAN. QazAqparat - Jyldaǵy dástúr boıynsha oblys ákimi Amandyq Batalov Jetisý óńiriniń ardagerlerimen Jańa jyl qarsańynda kezdesý ótkizdi.
Sharaǵa sanaly ǵumyryn oblystyń áleýmettik-ekonomıkalyq damýyna arnaǵan azamattar qatysty, dep habarlaıdy QazAqparat tilshisi.
Almaty bolǵan kezdesýde oblys ákimi A. Batalov óńirde Táýelsizdiktiń 25 jyldyǵy sheńberinde ótkizilgen sharalarǵa, «25 juldyzdy kún» aıasynda atqarylǵan isterge, 2016 jyly óńirdiń jetken jetistikterine toqtaldy.
«Qurmetti ardagerler! Bizdiń tiregimiz de, maqtanyshymyz da - Sizder. Sizdermen kezdesip, áńgimelesý biz asyǵa kútetin erekshe oqıǵa. Sizderdiń eljandylyqtaryńyz, ómirlik ustanymdaryńyz, kóp jyldyq tájirıbelerińiz elimizdiń, onyń ishinde oblysymyzdyń órkendeýine áli de qyzmet etetinine senimdimin. Jańa 2017 jylmen shyn júrekten quttyqtap, Sizderge myqty densaýlyq, uzaq ǵumyr, otbasylaryńyzǵa baq-bereke tileımin», - deı kele oblys ákimi A. Batalov ardagerlerge estelik syılyqtar tabys etti.
Óz kezeginde ardagerler oblysta atqarylyp jatqan jumystar týraly pikir almasyp, óz usynystary men tilekterin bildirdi.
