Almaty oblysynyń ákimi ardagerleri jáne zııaly qaýym ókilderimen júzdesti
ASTANA. QazAqparat - Almaty oblysynyń ákimi Amandyq Batalov óńirdiń eńbek ardagerlerimen jáne shyǵarmashylyq zııaly qaýym ókilderimen kezdesý ótkizdi. «Rýhanı jańǵyrý» baǵdarlamasy aıasyndaǵy bul beıresmı kezdesýdi Qazaqstan Respýblıkasynyń Prezıdenti syılyǵynyń laýreaty, ataqty jýrnalıst Beısen Quranbek júrgizdi, dep habarlaıdy oblysy ákiminiń baspasóz qyzmeti.
Óziniń quttyqtaý sózinde Amandyq Ǵabbasuly birinshi kezekte aǵa býyn ókilderiniń qoǵam ómirine belsendi túrde súbeli úlesterin qosyp kele jatqandyǵy úshin alǵysyn bildirdi. Osydan keıin oblys ákimi kezdesýge jınalǵandarǵa oblystyń áleýmettik-ekonomıkalyq damýy jaıynda qysqasha aqparat berip ótti.
Oblys ákimi Amandyq Batalov atap ótkendeı, aǵymdaǵy jyldyń qańtar-maýsym aılary aralyǵynda oblysta ónerkásip salasynda 329,4 mlrd teńgeniń ónimi óndirilgen. Naqty kólem ındeksi 104,4 % qurady. Aýylsharýashylyǵy salasynda da jaqsy kórsetkishterge qol jetkizildi. Qazirdiń ózinde 149,8 mlrd teńgeniń ónimi shyǵaryldy. Odan bólek, osy kezeń aralyǵynda oblysqa 174,6 mlrd teńge ınvestıtsııa tartyldy. Nátıjesinde 12 724 jańa jumys orny quryldy. Sonymen qatar, óńir basshysy memlekettik qoldaýdyń arqasynda áleýmettik salaǵa úlken kóńil bólinip jatqandyǵyn tilge tıek etti.
Eskirgen nysandar kúrdeli jóndeýden ótip, materıaldyq-tehnıkalyq bazalary jańartylýda. Jańadan sáýleti kelisken ǵımarattar boı kóterýde. «Bıyl 44 mektep salynýda, onyń 35-i jyl sońyna deıin paıdalanýǵa beriledi. Al atalǵan mektepterdiń 24-i Bilim kúni óz oqýshylaryna esikterin ashqaly tur. Óńirimizde memlekettik-jekemenshik seriktestiń tetikterin utymdy paıdalanýdyń arqasynda mektepke deıingi bilim berý mekemeleri kóptep ashylýda. Ózge de salalar boıynsha aýyz toltyryp aıtar jetistikter jeterlik. Atap aıtar bolsaq, joldardyń qurylysy, týrızmdi damytý jáne kóptegen basqa da jetistikterdi osy qatarǵa jatqyzýǵa bolady.
Bizdiń Sizdermen búgingi kezdesýimizdiń barysynda, men, Almaty oblysynyń áleýmettik-ekonomıkalyq damýynyń negizgi baǵyttaryna toqtalyp óttim. Osy sátti paıdalana otyryp, isimizdi qoldap, Jetisý ólkesiniń damýyna qosqan ólsheýsiz eńbekterińiz úshin Sizderge taǵy bir márte alǵysymdy jetkizgim keledi. Bizder úshin sizderdiń aqyl-keńesterińiz, kópjyldyq eńbek tájirıbelerińiz ben bilimderińiz óte mańyzdy. Ásirese, bolashaq urpaq tárbıesine degen sizderdiń tálim-tárbıelerińiz «Rýhanı jańǵyrý» baǵdarlamasynda kórsetilgen tapsyrmalardy oryndaýda úlken mánge ıe», - dedi óńir basshysy A.Batalov.
Kezdesý sońynda zııaly qaýym ókilderi men aqsaqaldar birqatar máseleler boıynsha óz oılarymen bólisip, oblys ákiminiń jumysyna sáttilik tiledi. Óńir basshysy aıtylǵan árbir usynysty nazaryna alyp, olar boıynsha belgili bir sheshimge keletindigin atap ótti.
Jalpy kezdesýge 80-nen astam ardagerler men zııaly qaýym ókilderi qatysty.
