Almaty oblysynyń ákimi ardagerlerdi qabyldady
ASTANA. QazAqparat - Búgin Almaty oblysynyń ákimi Amandyq Batalov Ardagerler uıymynyń 30 jyldyǵyna oraı óńir ardagerleri úshin saltanatty qabyldaý ótkizdi, dep habarlaıdy Almaty oblysy ákimdiginiń baspasóz qyzmeti.
Kezdesýde oblys basshysy men qarııalar pikir almasyp, keńinen áńgimelesti. Ardagerlerge aldymen oblystyń 9 aıdaǵy áleýmettik-ekonomıkalyq damýy týraly baıandaǵan oblys basshysy aldaǵy josparlar jaıynda da aıtyp ótti.
«Biz ótken 9 aıdaǵy áleýmettik-ekonomıkalyq damý qorytyndylaryn jasadyq. Kórsetkishterimiz jaman emes. Óńirde Memleket basshysy Nursultan Ábishuly Nazarbaevtyń aldymyzǵa qoıǵan mindetteri negizinde aýqymdy jumystar atqarylýda. Jaqyn kúnderi Aqsý qant zaýytyn iske qosamyz. Búgingi kúni zaýyt qyzylshany óńdeýge qabyldap jatyr. Jańǵyrtý jasalǵan Kóksý qant zaýyty da qazir tolyqqandy jumys istep tur. Oǵan sońǵy 3 jylda ınvestorlar 3 mlrd. teńgege jýyq qarjy quıdy», - dedi A. Batalov.
Oblys basshysy munan soń shekaralyq aımaqtardyń jaǵdaıyna, «Nurly jer», «Nurly jol» baǵdarlamalarynyń oryndalý barysyna da toqtalyp ótti.
A. Batalov memlekettik-jekemenshik áriptestik tetigi arqyly balalardy balabaqshamen qamtý deńgeıi jyl sońyna deıin 95 % jetetinin de aıtty. Sol sııaqty halyqty ortalyqtandyrylǵan aýyz sýmen qamtýǵa, oblystyq mańyzdaǵy, aýylishilik joldarǵa da kóńil bólinip otyrǵany tilge tıek etildi.
Óz kezeginde ardagerler oblys damýy, sonyń ishinde Aqsý qant zaýytynyń iske qosylýy erekshe qýantqanyna atap ótti.
«Aýdanymyzdyń turǵyndary 10 jyldan beri toqtap turǵan Aqsý qant zaýytynyń qaıta iske kiriskenine asa qýanyshty. Bul - úlken jetistik», - dedi Aqsý aýdandyq ardagerler keńesiniń tóraǵasy Amangeldi Aıtbaev.
«Dala arýy» atanǵan júgeri daqylyn ósirýdiń ilgerileýine Sotsıalıstik Eńbek Eri, Almaty oblysynyń Qurmetti azamaty Kúlásh Aıtjanova da rızashylyǵyn bildirdi.
«Júgeri - qashannan oblysymyzdyń basym baǵyttaǵy daqyldarynyń biri. Qazir zaýytymyz tolyqqandy jumys istep tur. Endi tuqymnyń gıbrıdimen, ózimizdiń tuqymdyq qorymyzdy qalyptastyrýǵa jumys isteýimiz kerek», - dep atap ótti K.Aıtjanova.
Aıtylǵan usynys-pikirlerge rızashylyǵyn bildirgen oblys basshysy aldaǵy ýaqytta óńirde tuqym sharýashylyǵyn damytýǵa baǵyttalǵan arnaıy zerthana ashylatynyn aıtty. Bul baǵytta qazir jumystar júrip jatyr.
Kezdesý sońynda ardagerler oblystyń damýyna jáne «Rýhanı jańǵyrý» baǵdarlamasyn júzege asyrýǵa, jas urpaqty tárbıeleýge óz úlesterin qosatyndyqtaryn jetkizdi. Munan soń Amandyq Batalov ardagerlermen birge oblystyń Qurmetti azamaty, qoǵam qaıratkeri Bátıma Saqaýovanyń úıine baryp, uıymnyń 30 jyldyǵymen quttyqtap qaıtty.
