Almaty oblysynyń ákimi 30 jyl ishindegi óńir jetistikteri týraly aıtty
«Bıyl barsha qazaqstandyqtar úshin aıryqsha jyl elimizdiń Táýelsizdigine 30 jyl tolady. Osy kúnge Almaty oblysy jaqsy nátıjelermen jetti. Máselen, jalpy óńirlik ónim kólemi 35 mln teńgeden 3,7 trln teńgege deıin ulǵaıdy. Ónerkásip ónimin shyǵarý 9,5 mln teńgeden 1 trln 200 mlrd teńgege deıin ósti, al aýyl sharýashylyǵynyń jalpy ónimi bıyl 1 trln teńgeden asady», - dedi A. Batalov Ortalyq kommýnıkatsııalar qyzmetinde.
Onyń aıtýynsha, 30 jyl ishinde 14,5 mln sharshy metr turǵyn úı paıdalanýǵa berildi. Bıýdjetke túsimder 1997 jylǵy 11 mlrd teńgeden 742 mlrd teńgege deıin ósti. 30 jylda oblys ekonomıkasyna 6,5 trln teńge ınvestıtsııa salyndy.
Sonymen qatar ol bıylǵy 10 aıdyń qorytyndysy boıynsha ekonomıkanyń barlyq salasynda turaqty ósim bolǵanyn aıtty.
«Jyl sońyna qaraı ónerkásip óniminiń kólemi 1 trln 300 mlrd teńgeden asady. Shıkizattyq emes eksport 6 paıyzǵa ósip, 392 mln AQSh dollaryna jetedi», - dedi ákim.