Almaty oblysynyń ákimdigi burynǵy kazıno ǵımaratyna kóshti

ALMATY. QazAqparat – Almaty oblysy ákimdiginiń apparaty Qonaev qalasyndaǵy burynǵy oıynhana ǵımaratyna kóshti, dep habarlaıdy QazAqparat tilshisi.

«Almaty oblysynyń ákimdigi Indýstrıalnaıa kóshesi, 16/4 mekenjaıynda ornalasqan ákimshilik ǵımaratqa kóshti. Ǵımarattyń jalpy aýdany – 11 891,8 sharshy metr. Bul ǵımaratta buryn kazıno bolǵan. Ol jer uzaq ýaqyt bos turdy», - dep habarlady ákimdiktiń baspasóz qyzmetinen.

Sonymen qatar, ǵımaratta ákim apparatynan bólek Almaty oblysynyń memlekettik qyzmet kórsetetin birqatar basqarmasy ornalasty.

Almaty oblystyq ákimdiginiń málimetinshe, ǵımaratty jalǵa alý jáne satyp alý quny naryqtaǵy baǵadan tómen. Aldaǵy ýaqytta ony satyp alý kózdelip otyr.

Buǵan deıin Qonaev qalasynyń ákimi Nurlan Qumataev shahar kelbeti qalaı ózgeretinin aıtyp bergen bolatyn.

Eske sala ketsek, osy jyldyń naýryz aıynda Memleket basshysy Qasym-Jomart Toqaevtyń usynysymen Almaty oblysy ekige bólindi. Mamyr aıynda Prezıdent Jarlyǵymen Almaty oblysynyń ákimshilik ortalyǵy Taldyqorǵan qalasynan Qonaev qalasyna kóshirildi.

Prezıdent Qasym-Jomart Toqaev Almaty oblysy jurtshylyǵymen kezdesýinde óńirdi damytýdyń basym baǵyttaryn aıqyndap bergen edi.